Euripides, Heracles
Gilbert Murray, Ed.

Χορός

875ὀτοτοτοτοτοῖ, στέναξον: ἀποκείρεται
σὸν ἄνθος πόλεος, ὁ Διὸς ἔκγονος:
μέλεος Ἑλλάς, ἃ τὸν εὐεργέταν
ἀποβαλεῖς, ὀλεῖς μανίαισιν Λύσσας
χορευθέντ᾽ ἐναύλοις.
880βέβακεν ἐν δίφροισιν ἁ πολύστονος,
ἅρμασι δ᾽ ἐνδίδωσι
κέντρον ὡς ἐπὶ λώβᾳ
Νυκτὸς Γοργὼν ἑκατογκεφάλοις
ὄφεων ἰαχήμασι, Λύσσα μαρμαρωπός.
885ταχὺ τὸν εὐτυχῆ μετέβαλεν δαίμων,
ταχὺ δὲ πρὸς πατρὸς τέκν᾽ ἐκπνεύσεται.

Ἀμφιτρύων

ἰώ μοι μέλεος.

Χορός

ἰὼ Ζεῦ, τὸ σὸν γένος ἄγονον αὐτίκα
λυσσάδες ὠμοβρῶτες ἄδικοι Ποιναὶ
890κακοῖσιν ἐκπετάσουσιν.

Ἀμφιτρύων

ἰὼ στέγαι.

Χορός

κατάρχεται χόρευμα τυμπάνων ἄτερ,
οὐ βρομίῳ κεχαρισμένα θύρσῳ ...

Ἀμφιτρύων

ἰὼ δόμοι.

Χορός

πρὸς αἵματ᾽, οὐχὶ τᾶς Διονυσιάδος
895βοτρύων ἐπὶ χεύμασι λοιβᾶς.

Ἀμφιτρύων

φυγῇ, τέκν᾽, ἐξορμᾶτε.

Χορός
δάιον τόδε
δάιον μέλος ἐπαυλεῖται.
κυναγετεῖ τέκνων διωγμόν: οὔποτ᾽ ἄκραντα δόμοισι
Λύσσα βακχεύσει.

Ἀμφιτρύων

900αἰαῖ κακῶν.

Χορός

αἰαῖ δῆτα τὸν γεραιὸν ὡς στένω
πατέρα τάν τε παιδοτρόφον, ᾇ μάταν
τέκεα γεννᾶται.
ἰδοὺ ἰδού,
905θύελλα σείει δῶμα, συμπίπτει στέγη.

Ἡρακλῆς

ἢ ἤ: τί δρᾷς, ὦ Διὸς παῖ, μελάθρῳ;
τάραγμα ταρτάρειον, ὡς ἐπ᾽ Ἐγκελάδῳ ποτέ, Παλλάς,
ἐς δόμους πέμπεις.

Ἄγγελος

ὦ λευκὰ γήρᾳ σώματ᾽ ...

Χορός
ἀνακαλεῖς με τίνα
910βοάν;

Ἄγγελος
ἄλαστα τἀν δόμοισι.

Χορός
μάντιν οὐχ
ἕτερον ἄξομαι.

Ἄγγελος

τεθνᾶσι παῖδες.

Χορός
αἰαῖ.

Ἄγγελος

στενάζεθ᾽, ὡς στενακτά.

Χορός
δάιοι φόνοι,
915δάιοι δὲ τοκέων χέρες: ὤ.

Ἄγγελος

οὐκ ἄν τις εἴποι μᾶλλον ἢ πεπόνθαμεν.

Χορός

πῶς παισὶ στενακτὰν ἄταν ἄταν
πατέρος ἀμφαίνεις;
λέγε, τίνα τρόπον ἔσυτο θεόθεν ἐπὶ
920μέλαθρα κακὰ τάδε,
τλήμονάς τε παίδων τύχας;