1. ad lectorem
Concinit clarum liber hic poetam.Venit a claris liber hic poetis:
Dignus est Phoebi liber hic amore
Praesidioque.
5Hoelceli librum decus hunc adornat.
Caesaris librum fauor hunc tuetur.
Hinc abi liuor niger, albe tantum
Candor adesto.
2. Blasio Hoelcelio
Sbrulia sydereum soboles penetraret olympum:Sbrulia caesareum si decus ora canant.
Sbrulia quam faustum domus omnis duceret aeuum:
Sbrulion austriacus si fouet altus honos.
5Sbrulia mundanum celebrarent undique numen
Laurea, lingua, modi, uox, tuba, plectra, lyrae.
Quare et saepe meis Blasi celebrande camoenis
Efficias, ut me Caesar habere uelit.
Caesar amat quodcumque uidet te semper amare:
10Consilioque frequens assidet ille tuo.
Nec fore me ingratum timeas, si Caesaris auram
Consequar ex meritis uir generose tuis.
Semper ero cultorque tui cultorque tuorum:
Hoelcelium semper nomen ad astra feram.
15Iuppiter in coelis, adsit tibi Caesar in orbe:
Vt uiuas foelix, et moriare Vale
3. Blasio Hoelcelio
Blasi Romuleae columen decus auraque linguae:Salue, et me saluum reddere quaere, precor.
Quum sis quem docti studeant cantare poetae:
Cui uariis cupiat quisque placere modis.
5Ad te confugimus. renuesne iuuare petentem
Vltro praesidium quae dare cautus amas?
Ergo age ne pigeat patroni sumere gratum
Munus, amiciciae. tu mihi pande fores.
4. Blasio Hoelcelio
Quisquis exoptat generosa regumStemmata et claros titulos et arma
Scribere, hunc curis opus est uacare
Candide Blasi.
5Siue sub tecto canat obsoleto:
Siue sub fuluo laquearis auro:
Siue sub fago, uiridique fronde:
Siue sub antris.
Vnde ego aeternis modulis laborans
10Caesaris laudes, genus, et parentes
Dicere: optarem mihi iam serenus
Iupiter esset.
Ac simul supplex precor, ut tuorum
Cinctus ingenti numero, praeceris
15Sint mihi gratae facilesque nostri
Caesaris aures.
5. Blasio Hoelcelio
Inter clamores strepitus, conuiuia, lusus.Facta legas hilari carmina fronte. Vale.
6. ad Blasium Hoelcelium
Non ita dulichius bisdenis ductor ab annis,Gauisus carae coniugis ore fuit.
Non magis euridicen cupido respexit ocello
Threicia uates maximus ille lyra.
5Quam nos incolumi tanto laetamur amico.
Post duo quem tandem lustra uidere datur.
O ter Appolinea salue spectabilis aura:
Cui deus et Caesar tot tribuere bona.
Nunc mea pestanis cingantur tempora sertis:
10Nunc curas carmen dissipet atque merum.
Tu nos Augusti uenerantes limina regis,
Ingenua foueas dexteritate. Vale.
7. ad eundem
Blasi Caesareae lux inuiolabilis aulae.Laurigeri columen presidiumque gregis.
Diuersae ueluti spectantur in orbe figurae:
Quas natura parens ingeniosa facit.
5Sic est diuersos hominum cognoscere mores:
Dissimiles animos, dissimilesque gradus.
Diuiciis inhiat populus uel honoribus, omnis:
Inde sibi quis non gaudia summa petit?
Attalicas ostentat opes ac sceptra Tyrannus:
10Suppetiis optat quemque subesse suis.
Pastor oues numerat, ua miles uulnera iactat:
Faecundo curuus gaudet arator agro.
Remigio foelix et picto nauita lintre
In uentis operam, sideribusque locat.
15Venator ceruos agitat, damasque fugaces:
Immemor hinc tenerae coniugis esse solet.
Delectant magnam spumantia pocula turbam:
Gaudia gens illinc martia multa capit.
Sunt qui diuino sophiae capiuntur amore:
20Et sola laeti cognitione manent.
Est aliud uatis studium, cunctisque probandum:
Cui pallas tantum cui cytherea placet.
Friuola contemnit uesani murmura uulgi.
Quasque hoc miratur, ridet et odit opes.
25Auribus est illi raris placuisse uoluptas:
Solus Apollo iuuat, sola puella iuuat.
Sola puella iuuat roseo perfusa colore:
Dulce mouere genas, dulceque docta loqui.
Hoc ego primaeuis studium sectatus ab annis:
30Strenuus in gemino tempus amore tero.
Empyreum primo mentem iactamus ad orbem:
Vnde Panomphei quaeritur aura patris.
Interdumque libet uarias discernere causas:
Quid fatum nobis, sydera quidue ferant.
35Quae uirtus animis, quae deducatur origo:
Cur in lethaeo turpiter amne fedent.
Vt nitido primum nitidi labantur ab axe:
Mox hinc atque illinc pessima quaeque trahunt.
Errones caecis illos erroribus implent:
40Ne propria ualeant dexteritate frui.
Torporem Saturnus alit: Venus auget amores.
Mars iram stimulat, Mercuriusque dolos.
Tum dulces nobis ostendunt omnia Musae.
Et nectar faciles, ambrosiamque parant.
45Vnde soli ueniant motus. palagique tumores:
Quid sol deficiat, deficiatque soror.
Quid nunc oceanum citius, nunc serius intret:
Quid nebule, quid agant flamina, rite docent.
Postmodo per terras hilares repetamus amoenas:
50Colligimus, siquid dulce cupido serit.
Excutis ipse grauem generose cupido ueternum:
Ad superas quemuis dirigis ipse domos.
Te duce phoebus erit: duce te gratissima palas:
Per te dulce mihi uiuere, dulce mori,
55Ad cypron, ad doctas unus me ducis Athenas:
Vnus alis mentem, corpus et unus alis,
Alta prius rapidas seruabunt aequora Tygres:
Vmbrosum delphin incolet ante nemus.
Quam sine te ueneris soboles pulcherrima uiuam:
60Quamue quies uacuo sit mihi grata thoro.
Viue cupido: tui uigeant foeliciter arcus:
Seruiciumque tibi crescat ubique nouum.
Vt tua flammatis ueneramur signa medullis:
Optata sic nos aliger ure face.
65Me populo secernit amor: secernit Apollo:
Natus uterque deo, dignus uterque deo.
Te uero Cytherea suo sociata gradiuo
Te Pallas semper pieridesque iuuant.
Ipse toga clarum Caesar fridericus et armis,
70Te nouit clarum saepius ille fide.
Tu modo pannoniis, Batauis modo nuncius oris:
Gesisti fausto qualia, quanta pede.
Singula quid memorem? quae totum temperat orbem,
Austria seruitio surgit ad astra tuo.
75Quatuor ex uno productos sanguine reges
Demeritus studiis es quater ipse nouis.
Foelix principibus tu iure probatus ab illis:
Pro meritis celebrem cui tribuere locum.
Commissos mira populos uirtute gubernas:
80Succurrisque bonis, solicitasque malos.
Te modo Germanus, modo supplex italus ambit:
Purpureusque tua Dux recreatur ope.
Praecipue te Caesar amat, te noscit alumnum:
Teque uocat, bello, pace, fidele caput.
85Quisquis in augusta te non complectitur aula:
Sedulus augustam non colit ille domum.
8. de uita et gestis Blasii Hoelcelii
Non maius Fabium Romana nomen in urbe:Publica quum Fabiis res gereretur, erit.
Quam decus Hoelcelium germano fulget in orbe:
Hoelceliamque auram Caesaris aula fouet.
5Quid mirum? dulci uenus aurea seruit alumno:
Pythius asseclam seruat Apollo suum.
Ambo numinibus tibi consuluere benignis:
Augustos coleres non sine laude lares.
Consilium placuit. primae sub flore iuuentae
10Accesti sacram Caesaris ipse domum.
Bisque nouem lapsis a foeta uirgine lustris:
Vt fuerant saeclis iuncta quaterna decem:
Romulidum primo uenisti, regis ad aulam:
Quae dignum digno caepit honore uirum.
15Tunc Nuremberga rex Maxmilianus in urbe
Concilio proceres continuitque duces.
Is sibi te comitem recipit, quem sydere fausto
In uarias sequeris sedulus usque uias.
Dehinc te ad pannonias legatis addidit urbes:
20Perspecta ingenii dexteritate tui.
Iam Fridericus erat uitali lumine functus:
Tristis erat natus, curia tristis erat.
Ipse redis Buda rebus foeliciter actis:
Solaris summum protinus ipse ducem.
25Mitteris ad belgas tanquam germanus Vlyxes
Gaudia maerori congeminare paras.
Quaeritur Hispano foelix hymeneus in orbe:
Regia qui pulso corda dolore iuuet.
Foelices taedas. foelitia foedera curas:
30Maximus unde polos Caesar et astra petit.
Illa quidem dextro processit copula fato.
Vnius auspicio prodiit illa Dei.
Hispana austriaco se mox Ioanna Philippo
Addixit: nec te praeterit iste labor.
35Nulla tibi requies fuit et tibi nulla uoluptas:
Donec coniugii spes solidata fuit.
Magnum opus interea dum dulcia foedera tractas
Numen bis phoebi reddidit hora. biceps
Quid Ferdinando potuit contingere regi
40Optatumque magis, conspicuumque magis?
Ille libens faciles extemplo prebuit aures:
Impiger et uotis annuit ille piis.
Nec mora fiat ait fieri quod Caesar adoptat:
Fortunentque sacras numina laeta faces.
45Tradimus insigni natam uirtute philippo:
Ille gener dabitur, filius ille mihi.
Nec renuo, quod amas, duplici sit copula nexu:
Aptius ex geminis sic erit una domus.
Vna domus latium, germanaque regna tenebit:
50Hesperiae leges condet et una domus.
Austria te quantis attollet tempore rebus:
Quos illi fines magnus Apollo dabit?
Nata, nurusque soror sit Margarita philippi:
Et nati coniunx haec Iohannis erit.
55Suppetit haud animo calamus: sed dicere conor.
Ex illa qualis quanta propago die.
Carolus austriaci proles generosa philippi:
Tot regnis fausto presidet ecce pede.
Iamque Getae metuunt illum, maurique potentes
60Christigenas forti protegit ille manu.
Vix adeo iuuenis sedes ingressus auitas
Turcarum laeto millia multa dedit.
Macte puer uirtute, bonis bone Carole diuis
Fide, sub imperio mox fore cuncta tuo.
65Maxime thura frequens des Maxmiliane tonanti:
Carolus ecce tuum tendit ad astra genus.
Aethereas utinam genitor quoque carperet auras:
Non sinerent priscos nomen habere duces.
Protinus ipse fores urbis moderator, et orbis
70Augustum ferres primus ad astra decus.
Fronte tamen nubem, mordaces pectore curas
Deme: tuum zephyrus flabit ad arbitrium.
Iamque uidere tuos uideor procul ipse triumphos:
Et pacem cunctis post fera bella datam.
75Quid Ferdinandum sileam? qui pectore forti
Gestat auos omneis, austriacosque duces.
Ille tibi Caesar quae gaudia quanta parabit?
Foelicis foelix ille bacillus aui.
Euehet augustum laetus super aethera nomen:
80Inclytus hostiles ille recidet opes:
Ferdinande tui non delebuntur honores.
Dum spes, dumque fides, dumque manebit amor.
Det modo nestoreos mundi tibi conditor annos:
Teque diu populis faxit adesse tuis
85Vt uetus Hectoreo tibi sanguine constat origo.
Vnde tot austrasiae prosiluere duces.
Hectora sic animis ardens aequabis et armis:
In te tam clari stemmatis auctor erit.
Quid tot commemorem pulcherrima pignora, natas
90Quas charites, pallas, condecoratque Venus.
Obscurant prisco celebratas tempore Nymphas.
Tergemina clarae nobilitate nitent.
Sunt patre, sunt atauis, et auo sunt Caesare dignae:
Regali dignae Caesareaque domo.
95Foelices quibus his thalamis consortibus uti
Contigerit: foelix illa futura dies.
Illa futura dies foelix, qua regibus omnes
Coniunctae reges, parturientque duces.
Austria sydereum contingens uertice coelum
100Gaudebit sobolem cuncta tenere suam.
At tibi quis grates ualeat persoluere dignas?
A quo fit talis tantaque culta seges?
Te Blasi merito fortunae riuus inaurat:
Et tibi nil Caesar Caesareique negant.
105Ad latus Augusti multos foeliciter annos
Egisti. fidus quoque sub axe comes.
Arcani custos pariter uenerandus et aeris:
Munere mancipii functus es usque boni.
Vtque est Aeneam feruens comitatus Achates,
110Seu bellum, seu pax suscipienda fuit.
Sic es magnanimi sectatus Caesaris aulam:
Vtilis hinc armis, utilis inde toga.
Non magis Atrides uafro fuit usus Ulyxe.
Siue domi cuperet uiuere, siue foris.
115Armipotens quam te per cuncta negotia Caesar
Ad stabilem uoluit rite uocare gradum.
Sic te militiae merito donauit honore:
Acer ut in Mysos arma cruenta tulit.
Sic te constituit quaestorem: sic tibi gaudet
120Diuitias larga contribuisse manu.
Sic Velleburgam pariter tibi tradidit arcem:
Quam reparas, miris condecorasque modis.
Vt merito possis tali pro munere dici:
Vellemburgensis conditor et dominus.
125Sic oenipontis speciosas mandat habenas.
Inque magistratu te locat ille sacro:
Vtque fores uario passim cumulatus honoret
Et uarias passim consequereris opes.
Te geminis carum reginis fecit, et una
130Hispanae scribam, pannoniaeqe dedit.
Post uarios demum fluctus, uariosque labores
Te rapit ad sanctum mater amoris opus.
Formoso nubit formosa puella marito:
Iungitur et claro foemina clara uiro.
135Rumula Romuleo sociata est uirgo clienti:
Illi tu belle congruis, illa tibi,
Blasius est Mariae contentus amore pudicae:
Et Maria est Blasi foedere leta sui.
Parte tuus fulsit foelix hymeneus ab omni:
140Cui duxit molles gratia nuda choros.
Cui Venus affulst melior, meliorque cupido:
Cui Caesar uultus prebuit ipse suos.
Bella quidem bellos conflauit copula natos:
Factus es ingenua denique prole parens.
145Nunc uiget Hoelcelius, nunc immortalis habetur:
Nobile nomen erit: nobile semen erit.
9. Blasio Hoelcelio
Pannonium donec Rhenus uenerabitur istrum:Et Phaetonteas exuperabit aquas.
Dum Tagus auriferas oeno mandabit harenas
Nullus et augustas non colet amnis opes.
5Hoelcelius longum producet Blasius aeuum:
Nunquam Laetheo proluet ora lacu.
