This text is part of:
View text chunked by:
Click on a word to bring up parses, dictionary entries, and frequency statistics
Francus inaudita dammam polit arte nitentem,
Quem ferat ad dominam sorte favente suam.
1 O quam vana teris poliendo tempora damma,
Deliciose puer, nam pectine semper eburno
Mansuetos verris clunes et lactea colla,
Suspensisque fricas manibus, gremioque tepenti
5Huius membra foves placido madefacta sopore.
Instruis ut miti porrecta cibaria dente
Carpat, et ad nutus celeri pede currat eriles
Admotasque manus lambat; cervice nitenti
Aurea dat crepitus dependens bulla sonoros
10Caelatamque gerens molli sub imagine nympham.
Munditiis innata viget; per vulnera mille
Oppeteret potius, maculis quam sordeat atris.
Frivolus hic labor est; viridi dum gramine gutta
Matutina nitet, fecunda in pascua, France,
15Duc avidas potius pecudes comitesque Molossos.
Fructiferis operanda modis studiosa iuventa est
Sedulitate mera, senio ne, France, trementi
Heu sis vicini vanus spectator acervi.
2 Utile consilium profers, nec sancta recuso
20Maturi documenta senis, sed, Galle, probandum est
Ingenii iuvenilis opus quod mente sagaci
Omnia praevideat baculo ventura senili.
3 Si viget in tenera velox prudentia mente,
Cur verbis adversa facis? docilique iuventa
25Cur tua venturos aetas non respicit annos?
An dabit iste tuus tam larga obsonia damma,
Ne gregis errandi te cura remordeat ulla?
4 Si labor esset iners, sterili si litus aratum
Vomere, si vigilis consumpta impensa lucernae,
30Esset ovis pascenda mihi; maiora recessu
Utiliore feram prima quam commoda fronte.
Nec spes fracta cadet, ni mens praesaga bonorum
Sit falsa decepta fide votisque sinistris.
5 Haud motu credenda levi est, nisi causa liquescat
35Nota prius; dubia dependet sorte futurum.
Votis saepe suis et tempore fallitur ipso .
Credula mens hominum; sed si fortuna secundet
Optatis ventura tuis, gaudere necesse est.
6 Edita nympha lacu cycnos pascente canoros
40Hic ubi femineum sortita est Mantua nomen
Arverno stat iuncta duci, quo bella movente
Arma infesta tremunt, domitoque ex hoste triumphat,
Qualis Thessalico Caesar memoratur in agro
Hostiles superasse manus, vel qualis Achilles
45Hectore ter rapto caesum fuit ultus amicum.
Non ita nix pura est canis quae montibus albet,
Haud planta calcata gravi, quam pulchra nitentis
Membra deae radiant; clarumque decentia factum
Nomina conveniunt sacrato imposta lavacro.
50Cornigeros alii cervos capreasque fugaces
Auritosque ferunt lepores ursosque feroces,
Ast ego dona fero roseae quae congrua nymphae
Mansuetaeque reor; damma non tersius ipso
Mitius aut animal, nec forma venustior exstat.
7 55Forsitan haec eadem curas ridebit inanes,
France, tuas, moto nec cardine firma patebit
Ianua pulsanti, neglectaque dona iacebunt.
8 Scilicet hoc tali natum est ex arbore germen
Quae lassum dulci venientem amplectitur umbra,
60Nec mundi pars ulla iacet qua mitior arbor
Fructificet; nostro iam nota est illa palato,
Dum vesana fames bilem stimularet acutam.
9 Omnia ieiuno sapiunt vel pessima ventri.
Saepe bibi crassam caenosi fluminis undam
65Aestibus in mediis; sitienti molle Falernum
Illa mihi visa est, grato vel suavia gustu
Massica, civili pressus vel clade Lyaeus.
10 Dulcior haec nympha est illa quam daedala cera
Mellificavit apis; tali pro nectare linquam
70Caelestem ambrosiam sacrum quae spirat odorem.
Interea coctum ferventi sinciput olla
Atque unctos lardo caules comedamus opimo.
Ecce vocat tardos mensa nos, Galle, parata
Docta saporiferas Phyllis condire popinas.
bucolica (W. P. Mustard, 1918).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.