Click on a word to bring up parses, dictionary entries, and frequency statistics
34.
Nerone tertium consule simul iniit consulatum
Valerius Messala, cuius proavum, oratorem Corvinum, divo
Augusto, abavo Neronis, collegam in eo magistratu fuisse
pauci iam senum meminerant. sed nobili familiae honor
auctus est oblatis in singulos annos quingenis sestertiis
quibus Messala paupertatem innoxiam sustentaret. Aurelio
quoque Cottae et Haterio Antonino annuam pecuniam
statuit princeps, quamvis per luxum avitas opes dissipassent.
Eius anni principio mollibus adhuc initiis prolatatum
inter Parthos Romanosque de obtinenda Armenia bellum
acriter sumitur, quia nec Vologeses sinebat fratrem Tiridaten
dati a se regni expertem esse aut alienae id potentiae
donum habere, et Corbulo dignum magnitudine populi
Romani rebatur parta olim a Lucullo Pompeioque recipere.
ad hoc Armenii ambigua fide utraque arma invitabant,
situ terrarum, similitudine morum Parthis propiores conubiisque permixti ac libertate ignota illuc magis ad servitium
inclinantes.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.