Click on a word to bring up parses, dictionary entries, and frequency statistics
2.
Tradit Cluvius ardore retinendae Agrippinam potentiae eo usque provectam ut medio diei, cum id temporis
Nero per vinum et epulas incalesceret, offerret se saepius
temulento comptam et incesto paratam; iamque lasciva
oscula et praenuntias flagitii blanditias adnotantibus proximis, Senecam contra muliebris inlecebras subsidium a
femina petivisse, immissamque Acten libertam quae simul
suo periculo et infamia Neronis anxia deferret pervulgatum
esse incestum gloriante matre, nec toleraturos milites profani principis imperium. Fabius Rusticus non Agrippinae
sed Neroni cupitum id memorat eiusdemque libertae astu
disiectum. sed quae Cluvius eadem ceteri quoque auctores
prodidere, et fama huc inclinat, seu concepit animo tantum
immanitatis Agrippina, seu credibilior novae libidinis meditatio in ea visa est quae puellaribus annis stuprum cum
Lepido spe dominationis admiserat, pari cupidine usque ad
libita Pallantis provoluta et exercita ad omne flagitium
patrui nuptiis.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.