Pliny the Elder, Naturalis Historia
Karl Friedrich Theodor Mayhoff, Ed.

celebratae sunt primum in ambulatione academiae athenis cubitorum xxxiii radice ramos antecedente. nunc est clara in lycia fontis gelidi socia amoenitate, itineri adposita, domicilii modo cava octoginta atque unius pedum specu, nemorosa vertice et se vastis protegens ramis arborum instar, agros longis obtinens umbris ac, ne quid desit speluncae imagini, saxea intus crepidinis corona muscosos conplexa pumices, tam digna miraculo, ut licinius mucianus ter consul et nuper provinciae eius legatus prodendum etiam posteris putaverit, epulatum intra eam se cum duodevicensimo comite, large ipsa toros praebente frondis, ab omni adflatu securum, optantem imbrium per folia crepitus, laetiorem quam marmorum nitore, picturae varietate, laquearium auro cubuisse in eadem. aliud exemplum gai principis in veliterno rure mirati unius tabulata laxeque ramorum trabibus scamna patula et in ea epulati, cum ipse pars esset umbrae, quindecim convivarum ac ministerii capaci triclinio, quam cenam appellavit ille nidum. est gortynae in insula creta iuxta fontem platanus una insignis utriusque linguae monimentis, numquam folia dimittens, statimque ei graeciae fabulositas superfuit iovem sub ea cum europa concubuisse, ceu vero non alia eiusdem generis esset in cypro. sed ex ea primum in ipsa creta, ut est natura hominum novitatis avida, platani satae regeneravere vitium, quandoquidem commendatio arboris eius non alia maior est quam soles aestate arcere, hieme admittere. inde in italiam quoque ad surburbana sua claudio principe marcelli aesernini libertus, sed qui se potentiae causa caesaris libertis adoptasset, spado thessalicus praedives, ut merito dici possit is quoque dionysius, transtulit id genus. durantque et in italia portenta terrarum praeter illa scilicet quae ipsa excogitavit italia.