Pliny the Elder, Naturalis Historia
Karl Friedrich Theodor Mayhoff, Ed.

eidem alexandro et equi magna raritas contigit. bucephalan eum vocarunt sive ab aspectu torvo sive ab insigni taurini capitis armo inpressi. xiii talentis ferunt ex philonici pharsalii grege emptum, etiam tum puero capto eius decore. neminem hic alium quam alexandrum regio instratu ornatus recepit in sedem, alias passim recipiens. idem in proeliis memoratae cuiusdam perhibetur operae, thebarum oppugnatione vulneratus in alium transire alexandrum non passus, multa praeterea eiusdem modi, propter quae rex defuncto ei duxit exequias urbemque tumulo circumdedit nomine eius. nec caesaris dictatoris quemquam alium recepisse dorso equus traditur, idemque similes humanis pedes priores habuisse, hac effigie locatus ante veneris genetricis aedem. fecit et Divus Augustus equo tumulum, de quo germanici caesaris carmen est. agrigenti conplurium equorum tumuli pyramides habent. equum adamatum a samiramide usque in coitum iuba auctor est. scythici quidem equitatus equorum gloria strepunt: occiso regulo ex provocatione dimicante hostem, cum ad spoliandum venisset, ab equo eius ictibus morsuque confectum; alium detracto oculorum operimento et cognito cum matre coitu petiisse praerupta atque exanimatum. aequa ex causa in reatino agro laceratum prorigam invenimus. namque et cognationum intellectus his est, atque in grege prioris anni sororem libentius etiam quam matrem equa comitatur. docilitas tanta est, ut universus sybaritani exercitus equitatus ad symphoniae cantum saltatione quadam moveri solitus inveniatur. iidem praesagiunt pugnam et amissos lugent dominos: lacrimas interdum desiderio fundunt. interfecto Nicomede rege equus eius inedia vitam finivit. phylarchus refert centaretum e galatis, in proelio occiso antiocho, potitum equo eius conscendisse ovantem, at illum indignatione accensum domitis frenis, ne regi posset, praecipitem in abrupta isse exanimatumque una. philistus a dionysio relictum in caeno haerentem, ut se evellisset, secutum vestigia domini examine apium iubae inhaerente, eoque ostento tyrannidem a dionysio occupatam.