Click on a word to bring up parses, dictionary entries, and frequency statistics
5.
horum parentes cognatique aegre pervicerunt,
ut legati ad consulem Romanum mitterentur. ii nondum
Canusium profectum, sed Venusiae cum paucis ac semiermibus consulem invenerunt, quam poterat maxime
miserabilem bonis sociis, superbis atque infidelibus, ut
erant Campani, spernendum.
[2]
et auxit rerum suarum
suique contemptum consul nimis detegendo cladem
nudandoque.
[3]
nam cum legati aegre ferre senatum
populumque Campanum adversi quicquam evenisse
Romanis nuntiassent pollicerenturque omnia, quae ad
bellum opus essent,
[4]
'morem magis' inquit 'loquendi
cum sociis servastis, Campani, iubentes, quae opus
essent ad bellum, imperare, quam conuenienter ad
praesentem fortunae nostrae status locuti estis. quid
enim nobis ad Cannas relictum est,
[5]
ut, quia aliquid
habeamus, id, quod deest, expleri ab sociis velimus?
pedites vobis imperemus, tamquam equites habeamus?
pecuniam deesse dicamus, tamquam ea tantum desit?
[6]
nihil ne quod suppleremus quidem, nobis reliquit fortuna. legiones equitatus arma signa equi virique
pecunia commeatus aut in acie aut binis postero die
amissis castris perierunt.
[7]
itaque non iuvetis nos in
bello oportet, Campani, sed paene bellum pro nobis
[p. 130]
suscipiatis.
[8]
veniat in mentem, ut trepidos quondam
maiores vestros intra moenia compulsos nec Samnitem
modo hostem sed etiam Sidicinum paventis, receptos
in fidem ad Saticulam defenderimus coeptumque propter
vos cum Samnitibus bellum per centum prope annos
variante fortuna eventum tulerimus.
[9]
adicite ad haec,
quod foedus aequum deditis, quod leges vestras, quod
ad extremum, id quod ante Cannensem certe cladem
maximum fuit, civitatem nostram magnae parti vestrum
dedimus communicavimusque vobiscum.
[10]
itaque communem vos hanc cladem, quae accepta est, credere,
Campani, oportet, communem patriam tuendam arbitrari esse.
[11]
non cum Samnite aut Etrusco res est, ut,
quod a nobis ablatum sit, in Italia tamen imperium
maneat; Poenus hostis, ne Africae quidem indigena,
ab ultimis terrarum oris, freto Oceani Herculisque
columnis, expertem omnis iuris et condicionis et linguae prope humanae militem trahit.
[12]
hunc natura et
moribus inmitem ferumque insuper dux ipse efferavit
pontibus ac molibus ex humanorum corporum strue
faciendis et, quod proloqui etiam piget, vesci corporibus humanis docendo.
[13]
his infandis pastos epulis, quas
contingere etiam nefas sit, videre atque habere dominos
et ex Africa et a Carthagine iura petere et Italiam
Numidarum ac Maurorum pati provinciam esse, cui
non, genito modo in Italia, detestabile sit?
[14]
pulchrum
erit, Campani, prolapsum clade Romanorum imperium
vestra fide, vestris viribus retentum ac recuperatum
esse.
[15]
triginta milia peditum, quattuor equitum arbitror
ex Campania scribi posse; iam pecuniae adfatim est
frumentique. si parem fortunae vestrae fidem habetis,
nec Hannibal se vicisse sentiet nec Romani victos esse.'
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.