Click on a word to bring up parses, dictionary entries, and frequency statistics
35. ” haec ubi dixit, conlaudatum multis verbis P. consul ex contione in senatum duxit.
[2]
ibi quoque ei ex auctoritate senatus gratiae actae tribunique militares in legione prima primum pilum virtutis causa ei adsignarunt. ceteri centuriones remissa appellatione ad dilectum oboedienter responderunt.
[3]
quo maturius in provincias magistratus proficiscerentur, Latinae kal. Iuniis fuere; eoque sollemni perfecto C. Lucretius praetor omnibus, quae ad classem opus erant, praemissis Brundisium est profectus.
[4]
praeter eos exercitus, quos consules conparabant, C. Sulpicio Galbae praetori negotium datum, ut quattuor legiones scriberet urbanas iusto numero peditum equitumque, iisque quattuor tribunos militum ex senatu legeret qui praeessent;
[5]
sociis Latini nominis imperaret quindecim milia peditum, mille et ducentos equites: is exercitus uti paratus esset, quo senatus censuisset.
[6]
[p. 116] P. Licinio consuli ad exercitum civilem socialemque petenti addita auxilia Ligurum duo milia, Cretenses 1 sagittarii — incertus numerus, quantum rogati auxilia Cretenses misissent —
[7]
, Numidae item equites elephantique. in eam rem legati ad Masinissam Carthaginiensesque missi L. Postumius Albinus Q. Terentius Culleo C. Aburius. in Cretam item legatos tres ire placuit, A. Postumium Albinum C. Decimium A. Licinium Nervam.
1 a. u. 583.
Livy. W. Weissenborn. Ab urbe condita. Berlin. Weidmannsche Buchhandlung. 1876. 9.2.
The National Endowment for the Humanities provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.