Titus Livius (Livy), The History of Rome, Book 44
W. Weissenborn, Ed.

18. [p. 98]extemplo apparuit omnibus non segniter id bellum L. Aemilium gesturum, praeterquam quod ... aliis vir erat, etiam quod dies noctesque intentus ea sola, quae ad id bellum pertinerent, ¹ animo agitabat. [2] iam omnium primum a senatu petiit, ut legatos in Macedoniam mitterent ad exercitus visendos classemque et conperta referenda, quid aut terrestribus aut navalibus copiis opus esset; [3] praeterea ut explorarent copias regias, quantum possent, quaque provincia nostra, qua hostium foret; utrum intra saltus castra Romani haberent, an iam omnes angustiae exsuperatae, et in aequa loca pervenissent; [4] qui fideles nobis socii, qui dubii suspensaeque ex fortuna fidei, qui certi hostes viderentur; quanti praeparati commeatus, et unde terrestri itinere, unde navibus supportarentur; quid ea aestate terra marique rerum gestarum esset: ex his bene cognitis certa in futurum consilia capi posse. [5] senatus Cn. Servilio consuli negotium dedit, ut tris in Macedoniam, quos L. Aemilio videretur, legaret. [6] [p. 99] legati biduo post profecti Cn. Domitius Ahenobarbus, A. Licinius Nerva, L. Baebius. ²in Romano agro, semel in Veienti; bis novendiale sacrum factum est. [7] sacerdotes eo anno mortui sunt P. Quinctilius Varus flamen Martialis et M. Claudius Marcellus decemvir, in cuius locum Cn. Octavius suffectus est. [8] iam magnificentia crescente notatum est, ludis circensibus P. Corneli Scipionis Nasicae et P. Lentuli aedilium curulium sexaginta tres Africanas et quadraginta ursos et elephantos lusisse.