Hide browse bar
Your current position in the text is marked in blue. Click anywhere in the
line to jump to another position:
Table of Contents:
Click on a word to bring up parses, dictionary entries, and frequency statistics
SCIPIO in Africa Carthaginienses et eundem Syphacem
Numidiae regem Hasdrubalemque pluribus proeliis vicit
adiuvante Masinissa;
bina hostium castra expugnavit,
in quibus quadraginta milia hominum ferro ignique
consumpta sunt.
Syphacem per C.
Laelium et Masinissam cepit.
Masinissa Sophonibam,
uxorem Syphacis,
filiam Hasdrubalis,
captam statim adamavit et nuptiis
factis uxorem habuit.
Castigatus a Scipione venenum
ei misit,
quo illa hausto decessit.
Effectumque multis
Scipionis victoriis ut Carthaginienses in desperationem acti
in auxilium publicae salutis Hannibalem revocarent.
Isque anno sexto decimo Italia decedens in Africam
traiecit temptavitque per conloquium pacem cum Scipione
conponere,
et cum de condicionibus pacis non convenisset,
acie victus est.
Pax Carthaginiensibus petentibus data
est.
Hannibal Gisgonem pacem dissuadentem manu sua
detraxit;
excusata deinde temeritate facti ipse pacem
suasit.
Masinissae regnum restitutum est.
Reversus in
urbem Scipio amplissimum nobilissimumque egit triumphum,
quem Q.
Terentius Culleo senator pilleatus secutus
est.
Scipio Africanus incertum militari prius favore an
populari aura ita cognominatus sit;
primus certe hic
imperator victae a se nomine gentis nobilitatus est.
Mago
bello quo in agro Insubrium cum Romanis conflixerat
volneratus,
dum in Africam per legatos revocatus revertitur,
ex volnere mortuus est.
