Titus Livius (Livy), The History of Rome, Book 33
Evan T. Sage, Ph.D. Professor of Latin and Head of the Department of Classics in the University of Pittsburgh, Ed.

15. Androsthenes omnium ignarus Corintho profectus ad Nemeam—amnis est Corinthium et Sicyonium¹ interfluens agrum—castra locat. [2] ibi partem dimidiam exercitus, divisam trifariam,² et omnes equites discurrere ad depopulandos simul Pellenensem Sicyoniumque agros et Phliasium iubet. [3] haec tria diversa agmina discessere. quod ubi Cleonas ad Nicostratum perlatum est, extemplo validam mercennariorum manum praemissam ad occupandum saltum, per quem transitus in Corinthium est agrum, [4?] ante signa equitibus ut praegrederentur locatis ipse confestim agmine duplici sequitur. [5] parte una mercennarii milites ibant cum levi armatura, altera clipeati; id in illarum³ gentium exercitibus robur erat. [6] iam haud procul castris aberant pedites equitesque, et Thracum quidam in vagos palatosque per agros hostes impetum fecerant,⁴ cum repens terror castris infertur. [p. 316] [7] trepidare dux, ut qui hostes nusquam nisi raros⁵ in⁶ collibus ante Sicyonem non audentes agmen demittere⁷ in campos vidisset, ab Cleonis quidem accessuros numquam credidisset. [8] revocari tuba iubet vagos a castris dilapsos⁸ ; ipse raptim capere arma iussis militibus infrequenti agmine porta egressus super flumen instruit aciem. [9] ceterae copiae, vix colligi atque instrui cum potuissent, primum hostium impetum non tulerunt; [10] Macedones et maxime omnium frequentes ad signa fuerant et diu ancipitem victoriae spem fecerunt; [11] postremo fuga ceterorum nudati, cum duae iam acies hostium ex diverso, levis armatura ab latere, clipeati caetratique a fronte urgerent, et ipsi re inclinata primo rettulere pedem, [12?] deinde impulsi terga vertunt et plerique abiectis armis, nulla spe castrorum tenendorum relicta, Corinthum petierunt. [13] Nicostratus mercennariis militibus ad hos persequendos, equitibus Thracumque auxiliis in populatores agri Sicyonii missis, magnam ibi quoque caedem edidit, maiorem prope quam in proelio ipso. [14] ex iis quoque qui Pellenen Phliuntaque depopulati erant, incompositi partim omniumque ignari⁹ ad castra revertentes in hostium stationes tamquam in suas illati sunt, [15?] partim ex discursu id quod erat suspicati ita se in fugam passim sparserunt¹⁰ ut ab ipsis agrestibus errantes circumvenirentur. [16] ceciderunt eo die mille [p. 318] et quingenti, capti trecenti. Achaia omnis magno¹¹ liberata metu.