previous next

Click on a word to bring up parses, dictionary entries, and frequency statistics

Eptir þetta sendir Eirekr konungr menn á fund Hrólfs konungs ok lætr bjóða honum til veizlu með liði sínu. Bregðr hann við skjótt ok ferr til Uppsala. Ok er Eirekr konungr spyrr þangatkvámu Hrólfs konungs, gengr hann í mót honum með alla hirð sína ok leiðir hann í hásæti hjá sér í höll sinni, skipar þar út í frá hans fóstbræðrum, drekka glaðir ok kátir. Síðan inna þeir til, hvat í þeira einkamál hafði komit, ok samdi þeim þat allt it bezta. Eptir þetta lætr Eirekr konungr kalla dóttur sína inn í höllina. Sem henni kómu orð föður síns, býst hún með inu mesta skarti, gengr inn í höllina með móður sinni ok mörgum öðrum kurteisum konum. Sem Eirekr dóttur sína inn koma, stóð hann upp í mót henni ok leiddi hana til sætis sér til annarrar handar með drottningu ok öllum þeim konum, er í þeira flokki váru. svá sem konungar höfðu drukkit um stund, vekr Hrólfr konungr bónorðit, svá at jungfrúin heyrði, ok þarf þat eigi með orðum at lengja, at Hrólfr konungr fastnar júmfrúna. Var þá aukin veizlan ok boðit til múg manna víða um Svíaveldi. Varð þessi veizla ágæt ok stóð hálfan mánuð. Ok at lokinni veizlu gefr Eirekr konungr öllum ríkismönnum ágætar gjafir með glöðum góðvilja, ok ferr þá hverr til síns heimilis með blíðu samþykki Eireks konungs. Hrólfr konungr sitr eptir í Svíþjóð með húsfreyju sína, ok takast með þeim góðar ástir. Hrólfr konungr sendir Ketil, bróður sinn, til ríkisstjórnar í Gautlandi. Ingjaldr ferr til Danmerkr til föður síns, Hrólfr konungr tekr þat ríki til forráða, er konungsdóttir hafði fyrir ráðit, sitja allir saman með náðum, hverr í þeim stað, sem kominn var.
load Vocabulary Tool
hide Display Preferences
Greek Display:
Arabic Display:
View by Default:
Browse Bar: