previous next

Click on a word to bring up parses, dictionary entries, and frequency statistics

eru konungs systr sóttar. Kannar Svanhvít sár Hrómundar ok saumar kviðinn saman ok leitar honum hægenda. Hún lét færa hann karli þeim til græðslu, er Hagall hét. Kerling hans var klók. Þau tóku vel við honum ok græddu hann at heilu. Þat fann Hrómundr, at þessi hjón váru margkunnug. Karl var vanr at veiða fiska, ok eitt sinn, er hann var at veiðiskap sínum, dró hann eina geddu, ok er hann kom heim ok krufði hana, fann hann í hennar maga Mistiltein, sverð Hrómundar, ok fekk honum þat. Hrómundr varð glaðr við ok kyssti á hjölt sverðsins ok umbunaði vel karli. Einn maðr var með Haldings konungs her, sem hét Blindr inn illi. Hann sagði konungi, at Hrómundr væri lífs ok græddr á laun hjá Hagali karli ok konu hans. Konungr kvað ótrúligt, at þau mundu þora at leyna honum. Konungr bauð at leita hans. Blindr fór með nokkura menn til húsa þeira Hagals ok spurði, ef Hrómundr væri þar geymdr. Kerling sagði hann mundi eigi þar finnast. Blindr leitaði vandliga ok fann eigi, því at kerling hafði falit Hrómund undir hitunarkatli sínum. Blindr ok hans félagar gengu þaðan, ok er þeir váru á leið komnir, sagði Blindr: "Eigi er ferð vár fræg orðin, ok skulum vér aptr snúa." Þeir gerðu svá, kómu heim ok fundu kerlingu. Sagði Blindr hún væri brögðótt, ok hefði hún geymt Hrómund undir katli sínum. "Leitið ok takið hann þar þá," kvað hún. En því sagði hún þetta, at þegar hún þeir sneru aptr, færði hún Hrómund í kvenskrúða ok lét hann mala ok snúa kvörn. Þeir leita í húsunum. Ok þegar þeir koma þar mærin sneri kvörninni, snuðruðu þeir allt um kring, en sama leit óhýrt til konungsmanna, sneru svá í brott, at þeir fundu eigi. Ok er þeir váru á leið komnir, sagði Blindr, at kerling mun hafa villt sjónir fyrir þeim ok sér þykki grunsamt, at Hrómundr muni hafa verit þat, sem sneri kvörninni í kvenklæðum, -- "ok ek oss hefir yfir sézt. Dugir oss eigi at þreyta við kerlingu, því at hún er oss klókari." Báðu þeir henni ills ok fóru heim aptr til konungs við svá búit.
load Vocabulary Tool
hide Display Preferences
Greek Display:
Arabic Display:
View by Default:
Browse Bar: