Click on a word to bring up parses, dictionary entries, and frequency statistics
“
[45]
quam antea nemo eo verbo nominarat)—hanc
igitur habemus, ut deos beatos et inmortales putemus. [p. 19]
quae enim nobis natura informationem ipsorum deorum dedit, eadem insculpsit in mentibus ut eos aeternos et beatos haberemus. Quod si ita est, vere exposita
illa sententia est ab Epicuro, quod beatum aeternumque sit id nec habere ipsum negotii quicquam nec
exhibere alteri, itaque neque ira neque gratia teneri,
quod quae talia essent inbecilla essent omnia.
Si nihil aliud quaereremus nisi ut deos pie coleremus
et ut superstitione liberaremur, satis erat dictum; nam
et praestans deorum natura hominum pietate coleretur, cum et aeterna esset et beatissima (habet enim
venerationem iustam quicquid excellit), et metus omnis a vi atque ira deorum pulsus esset; intellegitur
enim a beata inmortalique natura et iram et gratiam
segregari; quibus remotis nullos a superis inpendere
metus. sed ad hanc confirmandam opinionem anquirit animus et formam et vitam et actionem mentis atque agitationem in deo.
”
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.