Click on a word to bring up parses, dictionary entries, and frequency statistics
“
[92]
omnesne tibi illi delirare visi
sunt qui sine manibus et pedibus constare deum posse
decreverint?
Ne hoc quidem vos movet considerantis, quae sit
utilitas quaeque oportunitas in homine membrorum,
ut iudicetis membris humanis deos non egere? quid
enim pedibus opus est sine ingressu, quid manibus
si nihil conprehendendum est, quid reliqua discriptione omnium corporis partium, in qua nihil inane nihil sine causa nihil supervacuaneum est, itaque nulla
ars imitari sollertiam naturae potest. habebit igitur
linguam deus et non loquetur, dentes palatum fauces
nullum ad usum, quaeque procreationis causa natura
corpori adfinxit ea frustra habebit deus; nec externa
magis quam interiora, cor pulmones iecur cetera—
quae detracta utilitate quid habent venustatis (quando
quidem haec esse in deo propter pulchritudinem
voltis)?
”
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.