Click on a word to bring up parses, dictionary entries, and frequency statistics
“
[137]
Ex intestinis autem †alvo secretus a
reliquo cibo sucus is quo alimur permanat ad iecur per
quasdam a medio intestino usque ad portas iecoris (sic
enim appellantur) ductas et directas vias, quae pertinent ad iecur eique adhaerent; atque inde aliae * *
pertinentes sunt, per quas cadit cibus a iecore dilapsus.
ab eo cibo cum est secreta bilis eique umores qui e
renibus profunduntur, reliqua se in sanguinem vertunt
ad easdemque portas iecoris confluunt ad quas omnes
eius viae pertinent; per quas lapsus cibus in hoc ipso
loco in eam venam quae cava appellatur confunditur
perque eam ad cor confectus iam coctusque perlabitur;
a corde autem in totum corpus distribuitur per venas [p. 106]
admodum multas in omnes partes corporis pertinentes.
”
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.