Click on a word to bring up parses, dictionary entries, and frequency statistics
“
[141]
et aures, cum sonum percipere
debeant qui natura in sublime fertur, recte in altis corporum partibus collocatae sunt; itemque nares et, quod
omnis odor ad supera fertur, recte sursum sunt et,
quod cibi et potionis iudicium magnum earum est, non
sine causa vicinitatem oris secutae sunt. iam gustatus,
qui sentire eorum quibus vescimur genera deberet, habitat in ea parte oris qua esculentis et posculentis iter
natura patefecit. tactus autem toto corpore aequabiliter
fusus est, ut omnes ictus omnesque nimios et frigoris
et caloris adpulsus sentire possimus. atque ut in aedificiis architecti avertunt ab oculis naribusque dominorum ea quae profluentia necessario taetri essent aliquid habitura, sic natura res similis procul amandavit
a sensibus.
”
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.