Click on a word to bring up parses, dictionary entries, and frequency statistics
“
[158]
hominum igitur causa eas rerum copias comparatas
fatendum est. nisi forte tanta ubertas varietasque pomorum eorumque iucundus non gustatus solum sed [p. 114]
odoratus etiam et aspectus dubitationem adfert quin
hominibus solis ea natura donaverit. Tantumque abest ut haec bestiarum etiam causa parata sint, ut
ipsas bestias hominum gratia generatas esse videamus. quid enim oves aliud adferunt nisi ut earum
villis confectis atque contextis homines vestiantur;
quae quidem neque ali neque sustentari neque ullum
fructum edere ex se sine cultu hominum et curatione
potuissent. canum vero tam fida custodia tamque
amans dominorum adulatio tantumque odium in externos et tam incredibilis ad investigandum sagacitas
narium tanta alacritas in venando quid significat aliud
nisi se ad hominum commoditates esse generatos.
”
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.