Click on a word to bring up parses, dictionary entries, and frequency statistics
“
[49]
quae si bis bina
quot essent didicisset Epicurus certe non diceret; sed
dum palato quid sit optimum iudicat, "caeli palatum",
ut ait Ennius, non suspexit.
Nam cum duo sint genera siderum, quorum alterum [p. 68]
spatiis inmutabilibus ab ortu ad occasum commeans
nullum umquam cursus sui vestigium inflectat, alterum
autem continuas conversiones duas isdem spatiis cursibusque conficiat, ex utraque re et mundi volubilitas,
quae nisi in globosa forma esse non posset, et stellarum rutundi ambitus cognoscuntur.
Primusque sol, qui astrorum tenet principatum, ita
movetur ut, cum terras larga luce compleverit, easdem modo his modo illis ex partibus opacet; ipsa enim
umbra terrae soli officiens noctem efficit. nocturnorum
autem spatiorum eadem est aequabilitas quae diurnorum. eiusdemque solis tum accessus modici tum recessus et frigoris et caloris modum temperant. circumitus enim solis orbium quinque et sexaginta et trecentorum quarta fere diei parte addita conversionem
conficiunt annuam; inflectens autem sol cursum tum
ad septem triones tum ad meridiem aestates et hiemes
efficit et ea duo tempora quorum alterum hiemi senescenti adiunctum est alterum aestati: ita ex quattuor
temporum mutationibus omnium quae terra marique
gignuntur initia causaeque ducuntur.
”
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.