In Curetium.
Fallaces vitreo Stellas componere mundo
et vaga Saturni sidera saepe queri
venturumque Iovem paucis promittere nummis
Cureti genitor noverat Uranius.
5in prolem dilata ruunt periuria patris
et poenam merito filius ore luit.
nam spurcos avidae lambit meretricis hiatus
consumens luxu flagitiisque domum
et, quas fallacis collegit lingua parentis,
10has eadem nati lingua refundit opes.