Hei mihi, care pater, quantis mea vita periclis
Urgetur, quantis conteriturque malis!
Quanquam immatura premimur, vir magne, iuventa,
Quam subeunt durum sydera nostra gradum!
5Ah nimium nimiumque premit mea membra, Iohannes,
Pestis dira, patri res fugienda Iovi,
Pestis dira meos lacerat nunc unguibus artus
Et macie extenuat, corpus et omne meat.
Quam vulgo appellant scabiem iuvenesque senesque,
10Sed merito rabiem dicere posse putem,
Haec rabiesque luesque potest fera pessima dici,
Qua non saeva magis nulla et acerba magis.
Griphibus haec ungues, dentes atque ora leoni
Persimilis, ventrem et caetera membra lupus,
15Foedior Harpiis tigribusque hae saevior ipsis,
Callidior vulpe est: sic taciturna repit.
Non haec irato terris inmissa Tonante est,
Cum Pandora malis dolia plena tulit
(Haud tantum meruere nefas tua furta, Prometheu,
20Hae fuerat maior crimine poena tuo!),
Sed quondam, ut perhibent, Pluto indignatus
avernus
Amphitrioniadem corripuisse canem
Custodemque suum triplici vinxisse catena
Atque extra <stigios> proripuisse lares,
25Felle tumens, bili tunc primum concitus atra,
Saevus, acerba fremens et nigrior solito,
Hanc primum ardenti iussit Flegetontis ab unda
Mergere et ad stigios mox properare lacus,
Illic pestifero madefactam terque quaterque
30Flumine deinde plagam misit in aetheream:
Viventum omne iubet volucresque armenta ferasque
Atque hominum imprimis sollicitare genus;
Unguibus hos saevisque feram cum dentibus atram
Corporaque et facies dilacerare dedit.
35Haec mea, care pater, phisicorum maxime princeps,
Membra haec dilaniat dilaceratque cutem,
Nec misero datur ulla quies, mora nulla, sed aeque
Haec noctu excruciat excruciatque die,
Nec dapium ve potus ve mihi datur ulla voluptas;
40Solacium haec ullum sumere saeva negat;
Quin etiam Musas prohibet sacrumque Helicona
Haec colere atque ullum fingere posse pedem.
O perdenda lues, Furiis crudelior ipsis,
Unde tibi, unde hominum vita terenda datur?
45Quae tibi digna satis poterunt Iovis arma parari,
Quis pater ipse tuum perdat, iniqua, caput?
Sed dea dira negat (dea nam moritura nec usquam
est)
Fulmina se aut fluctus posse timere maris,
Nam Flegeton, cuius naturam traxit iniquam,
50Fertur flammigeras ferre malignus aquas;
Quin etiam ferro non est medicabilis ullo,
Nam stigio fuerat haec medicata lacu.
Haec quoque, cum foribus quam primum erupit
avernis,
Gustavit rabida saeva aconita fame,
55Unde etiam canibus fertur dea saevior ipsis,
Namque id cerbereum dicitur esse virus.
At tu, siqua pium tangunt incommoda pectus,
Si Phoebum aut Bacchum Pieridasque colis,
Iam medicas huic, oro, manus (fera pessima cedet!)
60Quam primum admoveas admoveasque fidem.
This text is part of:
Click on a word to bring up parses, dictionary entries, and frequency statistics
de scabie (A. Perosa, 1954).
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.