This text is part of:
Click on a word to bring up parses, dictionary entries, and frequency statistics
LACHES. PARMENO.
La.
Ex meo propinquo rure hoc capio commodi,
Neque agri neque urbis odium me umquam percipit.
Ubi satias coepit fieri commuto locum.
Sed estne ille noster Parmeno? et certe ipsus est.
5Quem praestolare, Parmeno, hic ante ostium?
Pa.
Quis homo est? ehem, salvum te advenire, here, gaudeo.
La.
Quem praestolare?
Pa.
Perii: lingua haeret metu.
La.
Hem, quid est? quid trepidas? satin salve? dic mihi.
Pa.
Here, primum te arbitrari quod res est velim;
10Quicquid huius factum est culpa non factum est mea.
La.
Quid?
Pa.
Recte sane interrogasti: oportuit
Rem praenarrasse me. Emit quendam Phaedria
Eunuchum quem dono huic daret.
La.
Cui?
Pa.
Thaidi.
La.
Emit? perii hercle: quanti?
Pa.
Viginti minis.
La.
15Actum est.
Pa.
Tum quandam fidicinam amat hic Chaerea.
La.
Hem, quid? amat? an scit iam ille quid meretrix siet?
An in Astu venit? aliud ex alio malum.
Pa.
Here, ne me spectes: me impulsore haec non facit.
La.
Omitte de te dicere: ego te, furcifer,
20Si vivo--Sed istuc, quicquid est, primum expedi.
Pa.
Is pro illo eunucho ad Thaidem deductus est.
La.
Pro eunuchon?
Pa.
Sic est: hunc pro moecho postea
Comprehendere intus, et constrinxere.
La.
Occidi.
Pa.
Audaciam meretricum specta.
La.
Numquid est
25Aliud mali damnive quod non dixeris
Reliquum?
Pa.
Tantum est.
La.
Cesso huc introrumpere?
Pa.
Non dubium est quin mihi magnum ex hac re sit malum;
Nisi quia necessus fuit hoc facere, id gaudeo,
Propter me hisce aliquid esse eventurum mali.
30Nam iam diu aliquam causam quaerebat senex,
Quamobrem insigne aliquid faceret iis. Nunc repperit.
Publii Terentii Comoediae VI. P. Terentius Afer. Edward St. John Parry, M.A. London. Whitaker and Co., Ave Maria Lane; George Bell, Fleet Street. 1857.
NSF, NEH: Digital Libraries Initiative, Phase 2 provided support for entering this text.
This text was converted to electronic form by professional data entry and has been proofread to a medium level of accuracy.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.