Titus Livius (Livy), The History of Rome, Book 43
W. Weissenborn, Ed.

[2] [p. 42]eodem anno C. Popilius et Cn. Octavius legati, qui in Graeciam missi erant, senatus consultum Thebis primum recitatum ¹per omnes Peloponnesi urbes circumtulerunt, ne quis ullam rem in bellum magistratibus Romanis conferret, praeterquam quod senatus censuisset. [3] hoc fiduciam in posterum quoque praebuerat, levatos se oneribus[que] inpensisque, quibus alia aliis inperantibus exhauriebantur. [4] Achaico concilio Aegi iis dato benigne locuti auditique, egregia spe futuri status fidissima gente relicta, in Aetoliam traiecerunt. [5] ibi nondum quidem seditio erat, sed omnia suspecta criminumque inter ipsos plena; [6] ob quae obsidibus postulatis neque exitu rei inposito in Acarnaniam inde profecti legati sunt. Thyri concilium legatis Acarnanes dederunt. [7] ibi quoque inter factiones erat certamen: quidam principum postulare, ut praesidia in urbes suas inducerentur adversus amentiam eorum, qui ad Macedonas gentem trahebant; [8] [p. 43] pars recusare, ne, quod bello captis et hostibus mos esset, id pacatae et sociae ² civitates ignominiae acciperent. [9] iusta deprecatio haec visa. Larisam ad Hostilium proconsulem—ab eo enim missi erant— legati redierunt. [10] Octavium retinuit secum, Popilium cum mille ferme militibus in hiberna Ambraciam misit.