350Et iam finis erat. Zephyrumque ratemque morantis
solverat amplexus1 tristi tuba tertia signo.
dant remo sua quisque viri, dant2 nomina transtris.
[p. 14]
hinc laevom Telamon pelagus tenet, altior inde
occupat Alcides aliud mare, cetera pubes
355dividitur: celer Asterion, quem matre cadentem3
Piresius4 gemino fovit pater amne Cometes,
segnior Apidani5 vires ubi sentit Enipeus.
nititur hinc Talaus fratrisque Leodocus6 urget
remo terga sui, quos nobile contulit Argos.
360hinc quoque missus adest quamvis arcentibus Idmon7
alitibus;8 sed turpe viro timuisse futura.
hic et Naubolides tortas consurgit in undas
Iphitus, hic patrium frangit Neptunius aequor
qui tenet undisonam Psamathen semperque patentem
365Taenaron Euphemus, mollique a litore Pellae
Deucalion certus iaculis et comminus ense
nobilis Amphion, pariter quos edidit Hypso
nec potuit similes voluitve ediscere vultus.
tum valida Clymenus percusso pectore tonsa
370frater et Iphiclus puppem trahit, et face saeva
in tua mox Danaos acturus saxa, Caphereu,
Nauplius, et tortum non a love fulmen Oileus
qui gemet,9 Euboicas nato stridente per undas,
quique Erymanthei sudantem10 pondere monstri
375Amphitryoniaden Tegeaeo limine Cepheus
iuvit, et Amphidamas (at frater plenior actis11
maluit Ancaeo vellus contingere Phrixi)
tectus et Eurytion servato colla capillo,
quem pater Aonias reducem tondebit ad aras.
380te quoque Thessalicae, Nestor, rapit in freta puppis
[p. 15]
fama, Mycenaeis olim qui candida velis
aequora et instantes12 mirabere mille magistros.
hic vates13 Phoebique fides non vana parentis
Mopsus, puniceo cui circumfusa cothurno
385palla imos ferit alba pedes vittataque fronte14
cassis et in summo laurus Peneia cono.
quin etiam Herculeo consurgit ab ordine Tydeus
Nelidesque Periclymenus, quem parva Methone
†felevis Elis equis et fluctibus obvius15 Aulon
390caestibus adversos viderunt frangere vultus. —
This text is part of:
Click on a word to bring up parses, dictionary entries, and frequency statistics
1 amplexus M (sed s post deletum), amplexu VC
2 uiri dant SM, uirida ut V
3 cadentem Barth, carentem V
4 Piresius Parrhasius, Crestus V, Cristatus C | lavit pro fovit Heinsius, sed cf. Stat. Theb. I 60 sq. et de hoc usu verbi Cels. I 5 os frigida aqua fovendum, Cels. IV 5, Plin. Nat. Hist. 28, 12
5 Signiorapida ut uires V, Segnior corr. SM, apidani Ms in marg.
6 Leodocus Iunt.1, leodecus V
7 Idmon Bon.2, ida V, ida
needschecking V2
8 Alitibus SM, Altibus V
9 gemet Bon.2, gemit V
10 erymanteis undantem V, corr. O2 M2
11 actis V, annis X2 in marg., N, fort. aevi
12 et instantes Eyssenhardt, nec stantes V, fort. et ecstantes
13 vates Bon.1, uatis VC
14 alba V, ima C | uittataque X2M, uittaque V | fronte Barth, forontem V
15 Feleuis V, Et leuis plerique codd. deteriores (praeferrem nec levis i. e. nec facilis), felixque Baehrens, fort. fervensque | obuius M, oblmis V
C. Valerius Flaccus. Otto Kramer. C. Valeri Flacci Setini Balbi Argonauticon Libri Octo. Leipzig. Teubner. 1913.
The Annenberg CPB/Project provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.