'Dicam' ait 'ac penitus causas labemque docebo'
Mopsus, et astra tuens 'non si mortalia membra
sortitusque breves et parvi tempora fati
380perpetimur, socius superi quondam ignis Olympi,
fas ideo miseere neces ferroque morantes
exigere1 hinc animas redituraque semina caelo.
quippe nec in ventos nec in ultima solvimur ossa:
ira manet duratque dolor. cum deinde tremendi
385ad solium venere Iovis questuque nefandam
edocuere necem, patet ollis ianua leti
atque iterum remeare licet; comes una sororum
additur et pariter terras atque aequora lustrant.
quisque suos sontes inimicaque pectora poenis
390implicat et varia meritos formidine pulsant.
at quibus invito2 maduerunt sanguine dextrae,
si fors saeva tulit miseros, sed proxima culpae,3
hos variis mens ipsa modis agit, et sua carpunt
facta viros: resides et iam nil amplius ausi
395in lacrimas humilesque metus aegramque fatiscunt
segnitiem, quos ecce vides. sed nostra requiret
cura viam. memori iam pridem cognita vati4
est procul ad Stygiae devexa silentia noctis
[p. 69]
Cimmerium domus5 et superis incognita tellus,
400caeruleo tenebrosa situ, quo flammea numquam
Sol iuga sidereos nec mittit Iuppiter annos.
stant tacitae6 frondes immotaque silva comanti
horret acerna7 iugo; specus umbrarumque meatus
subter et8 Oceani praeceps fragor arvaque nigro
405vasta metu et subitae post longa silentia voces.
ensifer hic atraque sedens in veste Celaeneus
insontes errore luit culpamque remittens
carmina turbatos volvit placantia manes.
ille mihi quae danda forent9 lustramina caesis
410prodidit, ille volens Erebum terrasque retexit.
ergo ubi puniceas oriens accenderit10 undas,
tu socios adhibe11 sacris armentaque magnis
bina deis; me iam coetus accedere vestros
haut fas interea, donec lustralia pernox
415vota fero. movet en gelidos Latonia currus:
flecte gradum, placitis12 sileant age litora coeptis.'
Iamque sopor mediis tellurem presserat horis
et circum tacito volitabant somnia mundo,
cum vigil arcani speculatus tempora sacri
420Ampycides petit adversis Aesepia13 silvis
flumina et aequoreas pariter decurrit ad undas.14
hic sale purpureo vivaque nitentia lympha
membra novat seque horrificis15 accommodat actis.
tempora tum vittis et supplice castus oliva
425implicat et stricto designat litora ferro;
circum humiles aras ignotaque nomina divum
instituit silvaque super contristat opaca,
[p. 70]
utque metum numenque loco sacramque quietem
addidit, ardenti nitidum iubar evocat alto.
This text is part of:
Click on a word to bring up parses, dictionary entries, and frequency statistics
1 Exigere M, Exiere V
2 fort. invitae
3 culpae cod. Burmanni, culpa V
4 uati cod. Burmanni, uate V
5 Eumenidum domus C
6 tacitae Bon.2, sitae a V1 corr. in citae
7 acerna Sudhaus et rei causa et metri, cf. Aen. IX 87 et Serv. ad Aen. II 16, uerna V, Averna Hein- sius
8 et 405 inverso ordine in V, corr. Bon.1
9 forent XM2, fores V
10 accenderit Burmann, ascenderit V
11 adhibe M2, Slothouwer, adhibere V
12 placidis cod. Bon.
13 esepia V, Aesopia Ca, Asopia Cb
14 undas SM2, undā V
15 horrificis M, horrigis V
C. Valerius Flaccus. Otto Kramer. C. Valeri Flacci Setini Balbi Argonauticon Libri Octo. Leipzig. Teubner. 1913.
The Annenberg CPB/Project provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.