His ubi nequiquam nutantem Colchida curis
Iuno videt necdum extremo parere furori,
155non iam mentitae vultum vocemque resumit
Chalciopes. quando ardor hebet1 leviorque pudori
...
mensque obnixa malo, tenues sublimis in auras
tollitur et fulvo Venerem vestigat Olympo.
'sum memor, ut †tecum† mecum2 partita laborem;
160illa nimis sed dura manet conversaque in iram
et furias dolet ac me nunc decepta3 reliquit.
i, precor, atque istum quo me frustratur amorem
vince, precor, patriis ut tandem evadere tectis
audeat atque meum casu defendere ab omni
[p. 164]
165Aesoniden: vis4 illa sacro, quo freta, veneno.
illum etiam totis adstantem noctibus anguem,
qui nemus omne suum quique aurea (respice porro)
vellera tot spiris circum, tot ductibus implet,
fallat5 et in somnos ingenti solvat ab orno.
170haec tibi: nam6 Furiis atque ipsi cetera mando.'
Tum Venus aligerum7 mater sic fatur Amorum:
'nec tibi, cum primos adgressa es flectere sensus
virginis ignotaque animum contingere cura,
defuimus, data continuo quin8 cingula soli
175nostra tibi, quis mota loco labefactaque cessit.
haut satis est, sed me ipsa opus, et9 cunctantia poscunt
pectora me dubiusque pudor: iam foedera faxo
Aesonii10 petat ipsa viri metuatque morari.
tu face luciferae11 citus ad delubra Dianae
180deveniat, sacras solita est ubi fundere taedas12
Colchis et aequali dominam lustrare caterva.
nec te nunc Hecates subeat metus, aut mea forte
impediat ne coepta time;13 quin audeat opto:
continuo transibit amor, cantuque trilingui
185ipsam flammiferos cogam compescere tauros.'
...
amplexuque petit;14 volucrem tunc aspicit Irin
festinamque15 iubet monitis parere Diones
et iuvenem Aesonium praedicto sistere luco.
protinus hinc Iris Minyas, Cytherea petivit
[p. 165]
190Colchida; Caucaseis speculatrix16 Iuno resedit
rupibus, attonitos Aeaea in moenia vultus
speque metuque tenens et adhuc ignara futuri.
Vix primas occulta Venus prospexerat arces,
virginis ecce novus mentem perstringere languor
195incipit; ingeminant commotis questibus aestus.
ergo iterum sensus varios super hospite volvens
maeret et absenti nequiquam talia fatur:
'si tibi Thessalicis, nunc si tua forte venenis
mater et heu, siqua est, posset succurrere coniunx.
200quidve tuos virgo possim nisi flere labores?
hoc satis ipse ...........
ei mihi, ne casus etiam spectare supremos17
atque iterum durae18 cogar comes ire sorori.
et nunc ille sua non quemquam sorte19 moveri,
non ullum meminisse putat, cumque omnibus odit
205me quoque. siquando fuerit tamen ulla potestas,
illum ego, qui diris cinis ultimus haeserit arvis,20
ossaque, quis tauri saevusque pepercerit ignis,
componam sedemque21 dabo. fas tunc mihi manes
dilexisse viri tumuloque has reddere curas.'
This text is part of:
Click on a word to bring up parses, dictionary entries, and frequency statistics
1 hebet T1 Bon.2, habet V | pudori V, pudore est Madvig; mihi talia excidisse videntur cedit amor meliorque redit iam pectore sensus
2 tecum mecum V, totum mecum C
3 decepta V, furiata C
4 vis Sudhaus, quis V, queis C, quin Iunt. 1 | sacris C
5 fallat Loehbach, Scluat V, alii alia coniecerunt
6 nam Bon.1, non V
7 aligerum M, alierum V | fatur Amorum Bon.1, futura morum V
8 quin Heinsius, om. V, sed C
9 opus et V, opus est C
10 Aesonii M, Aesoni V
11 luciferae V, letiferae C
12 taedas M, aedas V
13 ne coepta time Heinsius, nec aetati me V, nunc acta time C
14 ante hunc versum excidit versus huius fere sententiae talia iactantem blandis Saturnia dictis | peti V, peti C
15 Festinamque C, Festinansque V
16 speculatrix M, speluncatrix V
17 Hoc satis ipse etiam spectare supraemos V (etiam sp. su. ex v. 201a), suppleas fere hoc satis ipse putes, miserae quod linquitur unum
18 dirae C | ire V, esse C
19 sorte Bon.1, forte V
20 aruis V, oris C
21 sedemque M, sedem V
C. Valerius Flaccus. Otto Kramer. C. Valeri Flacci Setini Balbi Argonauticon Libri Octo. Leipzig. Teubner. 1913.
The Annenberg CPB/Project provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.