This text is part of:
Click on a word to bring up parses, dictionary entries, and frequency statistics
8.
Sed apud senatum omnia in maius celebrata sunt
sententiis eorum qui supplicationes et diebus supplicationum
vestem principi triumphalem, utque ovans urbem iniret,
effigiemque eius pari magnitudine ac Martis Vltoris eodem
in templo censuere, praeter suetam adulationem laeti quod
Domitium Corbulonem retinendae Armeniae praeposuerat
videbaturque locus virtutibus patefactus. copiae Orientis ita
dividuntur, ut pars auxiliarium cum duabus legionibus apud
provinciam Syriam et legatum eius Quadratum Vmmidium
remaneret, par civium sociorumque numerus Corbuloni esset
additis cohortibus alisque quae in Cappadocia hiemabant.
socii reges prout bello conduceret parere iussi: sed studia
eorum in Corbulonem promptiora erant. qui ut instaret
famae, quae in novis coeptis validissima est, itinere propere
confecto apud Aegeas civitatem Ciliciae obvium Quadratum
habuit, illuc progressum, ne, si ad accipiendas copias Syriam
intravisset Corbulo, omnium ora in se verteret, corpore
ingens, verbis magnificis et super experientiam sapientiamque etiam specie inanium validus.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.