previous

Click on a word to bring up parses, dictionary entries, and frequency statistics


Ἠλέκτρα

περί μοι στέρνοις στέρνα πρόσαψον,
σύγγονε φίλτατε:
διὰ γὰρ ζευγνῦσ᾽ ἡμᾶς πατρίων
μελάθρων μητρὸς φόνιοι κατάραι.

Ὀρέστης

1325βάλε, πρόσπτυξον σῶμα: θανόντος δ᾽
ὡς ἐπὶ τύμβῳ καταθρήνησον.

Διόσκουροι

φεῦ φεῦ: δεινὸν τόδ᾽ ἐγηρύσω
καὶ θεοῖσι κλύειν.
ἔνι γὰρ κἀμοὶ τοῖς τ᾽ οὐρανίδαις
1330οἶκτοι θνητῶν πολυμόχθων.

Ὀρέστης

οὐκέτι σ᾽ ὄψομαι.

Ἠλέκτρα

οὐδ᾽ ἐγὼ ἐς σὸν βλέφαρον πελάσω.

Ὀρέστης

τάδε λοίσθιά μοι προσφθέγματά σου.

Ἠλέκτρα

χαῖρε, πόλις:
1335χαίρετε δ᾽ ὑμεῖς πολλά, πολίτιδες.

Ὀρέστης

πιστοτάτη, στείχεις ἤδη;

Ἠλέκτρα

στείχω βλέφαρον τέγγουσ᾽ ἁπαλόν.

Ὀρέστης

1340Πυλάδη, χαίρων ἴθι, νυμφεύου
δέμας Ἠλέκτρας.

Διόσκουροι

τοῖσδε μελήσει γάμος: ἀλλὰ κύνας
τάσδ᾽ ὑποφεύγων στεῖχ᾽ ἐπ᾽ Ἀθηνῶν:
δεινὸν γὰρ ἴχνος βάλλουσ᾽ ἐπὶ σοὶ
1345χειροδράκοντες χρῶτα κελαιναί,
δεινῶν ὀδυνῶν καρπὸν ἔχουσαι:
νὼ δ᾽ ἐπὶ πόντον Σικελὸν σπουδῇ
σῴσοντε νεῶν πρῴρας ἐνάλους.
διὰ δ᾽ αἰθερίας στείχοντε πλακὸς
1350τοῖς μὲν μυσαροῖς οὐκ ἐπαρήγομεν,
οἷσιν δ᾽ ὅσιον καὶ τὸ δίκαιον
φίλον ἐν βιότῳ, τούτους χαλεπῶν
ἐκλύοντες μόχθων σῴζομεν.
οὕτως ἀδικεῖν μηδεὶς θελέτω
1355μηδ᾽ ἐπιόρκων μέτα συμπλείτω:
θεὸς ὢν θνητοῖς ἀγορεύω.

Χορός

χαίρετε: χαίρειν δ᾽ ὅστις δύναται
καὶ ξυντυχίᾳ μή τινι κάμνει
θνητῶν, εὐδαίμονα πράσσει.

Creative Commons License
This work is licensed under a Creative Commons Attribution-ShareAlike 3.0 United States License.

An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.

hide References (1 total)
  • Cross-references in general dictionaries to this page (1):
load Vocabulary Tool
hide Display Preferences
Greek Display:
Arabic Display:
View by Default:
Browse Bar: