Euripides, Electra
Gilbert Murray, Ed.

Πρέσβυς

οἱ δὲ ξένοι ποῦ; βούλομαι γὰρ εἰσιδὼν
αὐτοὺς ἔρεσθαι σοῦ κασιγνήτου πέρι.

Ἠλέκτρα

οἵδ᾽ ἐκ δόμων βαίνουσι λαιψηρῷ ποδί.

Πρέσβυς

550ἀλλ᾽ εὐγενεῖς μέν, ἐν δὲ κιβδήλῳ τόδε:
πολλοὶ γὰρ ὄντες εὐγενεῖς εἰσιν κακοί.
ὅμως δέ. — χαίρειν τοὺς ξένους προσεννέπω.

Ὀρέστης

χαῖρ᾽, ὦ γεραιέ. — τοῦ ποτ᾽, Ἠλέκτρα, τόδε
παλαιὸν ἀνδρὸς λείψανον φίλων κυρεῖ;

Ἠλέκτρα

555οὗτος τὸν ἁμὸν πατέρ᾽ ἔθρεψεν, ὦ ξένε.

Ὀρέστης

τί φῄς; ὅδ᾽ ὃς σὸν ἐξέκλεψε σύγγονον;

Ἠλέκτρα

ὅδ᾽ ἔσθ᾽ ὁ σώσας κεῖνον, εἴπερ ἔστ᾽ ἔτι.

Ὀρέστης

ἔα:
τί μ᾽ ἐσδέδορκεν ὥσπερ ἀργύρου σκοπῶν
λαμπρὸν χαρακτῆρ᾽; ἢ προσεικάζει μέ τῳ;

Ἠλέκτρα

560ἴσως Ὀρέστου σ᾽ ἥλιχ᾽ ἥδεται βλέπων.

Ὀρέστης

φίλου γε φωτός. τί δὲ κυκλεῖ πέριξ πόδα;

Ἠλέκτρα

καὐτὴ τόδ᾽ εἰσορῶσα θαυμάζω, ξένε.

Πρέσβυς

ὦ πότνι᾽, εὔχου, θύγατερ Ἠλέκτρα, θεοῖς.

Ἠλέκτρα

τί τῶν ἀπόντων ἢ τί τῶν ὄντων πέρι;

Πρέσβυς

565λαβεῖν φίλον θησαυρόν, ὃν φαίνει θεός.

Ἠλέκτρα

ἰδού: καλῶ θεούς. ἢ τί δὴ λέγεις, γέρον;

Πρέσβυς

βλέψον νυν ἐς τόνδ᾽, ὦ τέκνον, τὸν φίλτατον.

Ἠλέκτρα

πάλαι δέδορκα, μὴ σύ γ᾽ οὐκέτ᾽ εὖ φρονῇς.

Πρέσβυς

οὐκ εὖ φρονῶ 'γὼ σὸν κασίγνητον βλέπων;

Ἠλέκτρα

570πῶς εἶπας, ὦ γεραί᾽, ἀνέλπιστον λόγον;

Πρέσβυς

ὁρᾶν Ὀρέστην τόνδε τὸν Ἀγαμέμνονος.

Ἠλέκτρα

ποῖον χαρακτῆρ᾽ εἰσιδών, ᾧ πείσομαι;

Πρέσβυς

οὐλὴν παρ᾽ ὀφρύν, ἥν ποτ᾽ ἐν πατρὸς δόμοις
νεβρὸν διώκων σοῦ μέθ᾽ ᾑμάχθη πεσών.

Ἠλέκτρα

575πῶς φῄς; ὁρῶ μὲν πτώματος τεκμήριον.

Πρέσβυς

ἔπειτα μέλλεις προσπίτνειν τοῖς φιλτάτοις;

Ἠλέκτρα

ἀλλ᾽ οὐκέτ᾽, ὦ γεραιέ: συμβόλοισι γὰρ
τοῖς σοῖς πέπεισμαι θυμόν. — ὦ χρόνῳ φανείς,
ἔχω σ᾽ ἀέλπτως —

Ὀρέστης
κἀξ ἐμοῦ γ᾽ ἔχῃ χρόνῳ.

Ἠλέκτρα

580οὐδέποτε δόξασα.

Ὀρέστης
οὐδ᾽ ἐγὼ γὰρ ἤλπισα.

Ἠλέκτρα

ἐκεῖνος εἶ σύ;

Ὀρέστης
σύμμαχός γέ σοι μόνος.
ἢν δ᾽ ἀνσπάσωμαί γ᾽ ὃν μετέρχομαι βόλον —
πέποιθα δ᾽: ἢ χρὴ μηκέθ᾽ ἡγεῖσθαι θεούς,
εἰ τἄδικ᾽ ἔσται τῆς δίκης ὑπέρτερα.