This text is part of:
Click on a word to bring up parses, dictionary entries, and frequency statistics
[7]
Nam quid
Macrum numerem? Cuius loquacitas habet aliquid
argutiarum nec id tamen ex illa erudita Graecorum
copia, sed ex librariolis Latinis: in orationibus autem
multa sane apta Latino sermoni impertiens, Sisenna,
eius amicus, omnis adhuc nostros scriptores—nisi
qui forte nondum ediderunt, de quibus existimare
non possumus—facile superauit. Is tamen neque
orator in numero uestro umquam est habitus, et in
historia puerile quiddam consectatur, ut unum Clitarchum neque praeterea quemquam de Graecis legisse
uideatur, eum tamen uelle dumtaxat imitari: quem
si adsequi posset, aliquantum ab optumo tamen
abesset. Quare tuum est munus hoc, a te exspectatur;
nisi quid Quinto uidetur secus.
3.
M. Tullius Cicero. De Legibus. Georges de Plinval. Paris. Belles Lettres. 1959. Scanned printed text.
The National Endowment for the Humanities provided support for entering this text.
