Click on a word to bring up parses, dictionary entries, and frequency statistics
18.
Per idem tempus Chauci nulla dissensione domi et
morte Sanquinii alacres, dum Corbulo adventat, inferiorem
Germaniam incursavere duce Gannasco, qui natione Canninefas, auxiliare stipendium meritus, post transfuga, levibus
navigiis praedabundus Gallorum maxime oram vastabat, non
ignarus ditis et imbellis esse. at Corbulo provinciam ingres-
sus magna cum cura et mox gloria, cui principium illa
militia fuit, triremis alveo Rheni, ceteras navium, ut quaeque habiles, per aestuaria et fossas adegit; luntribusque
hostium depressis et exturbato Gannasco, ubi praesentia
satis composita sunt, legiones operum et laboris ignavas,
populationibus laetantis, veterem ad morem reduxit, ne quis
agmine decederet nec pugnam nisi iussus iniret. stationes
vigiliae, diurna nocturnaque munia in armis agitabantur;
feruntque militem quia vallum non accinctus, atque alium
quia pugione tantum accinctus foderet, morte punitos. quae
nimia et incertum an falso iacta originem tamen e severitate
ducis traxere; intentumque et magnis delictis inexorabilem scias cui tantum asperitatis etiam adversus levia credebatur.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.