Click on a word to bring up parses, dictionary entries, and frequency statistics
51.
Nec aliud Radamisto subsidium fuit quam pernicitas equorum, quis seque et coniugem abstulit. sed coniunx
gravida primam utcumque fugam ob metum hostilem et
mariti caritatem toleravit; post festinatione continua, ubi
quati uterus et viscera vibrantur, orare ut morte honesta
contumeliis captivitatis eximeretur. ille primo amplecti
adlevare adhortari, modo virtutem admirans, modo timore
aeger ne quis relicta poteretur. postremo violentia amoris
et facinorum non rudis destringit acinacen vulneratamque
ripam ad Araxis trahit, flumini tradit ut corpus etiam
auferretur: ipse praeceps Hiberos ad patrium regnum per-
vadit. interim Zenobiam (id mulieri nomen) placida in
eluvie spirantem ac vitae manifestam advertere pastores,
et dignitate formae haud degenerem reputantes obligant
vulnus, agrestia medicamina adhibent cognitoque nomine et
casu in urbem Artaxata ferunt; unde publica cura deducta
ad Tiridaten comiterque excepta cultu regio habita est.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.