M. Tullius Cicero, Philippics
Albert Clark, Albert Curtis Clark, Ed.

4. [8] atque ea quidem quae dixi de Caesare deque eius exercitu iam diu nota sunt nobis. virtute enim admirabili Caesaris constantiaque militum veteranorum legionumque earum quae optimo iudicio¹ auctoritatem nostram, libertatem populi Romani, virtutem Caesaris² secutae sunt a cervicibus nostris est depulsus Antonius. sed haec, ut dixi³, superiora: hoc vero recens edictum D. Bruti quod paulo ante propositum est certe silentio non potest praeteriri. pollicetur enim se provinciam Galliam retenturum in senatus populique Romani potestate⁴. O civem natum rei publicae, memorem sui nominis imitatoremque maiorum! neque enim Tarquinio expulso maioribus nostris tam fuit optata libertas quam est depulso⁵ Antonio⁶ retinenda nobis. [9] illi regibus parere iam a condita urbe didicerant⁷: nos post reges exactos servitutis oblivio ceperat. atque ille Tarquinius quem maiores nostri non tulerunt non crudelis, non impius⁸, sed superbus est habitus et dictus: quod nos vitium in privatis saepe tulimus, id maiores nostri ne in rege quidem ferre potuerunt. L. Brutus regem superbum non tulit: D. Brutus sceleratum atque impium regnare patietur⁹ Antonium? quid Tarquinius tale qualia innumerabilia et facit et fecit Antonius? senatum etiam reges habebant: nec tamen, ut Antonio senatum habente, in consilio regis versabantur barbari armati. servabant auspicia reges; quae hic consul augurque neglexit, neque solum legibus contra auspicia ferendis sed etiam conlega una ferente¹⁰ eo quem ipse ementitis auspiciis vitiosum fecerat. [10] quis autem rex umquam fuit tam insignite impudens ut haberet omnia commoda, beneficia, iura regni venalia? quam hic immunitatem, quam civitatem, quod praemium non vel singulis hominibus vel civitatibus vel universis provinciis vendidit? nihil humile de Tarquinio, nihil sordidum accepimus: at vero huius domi inter quasilla¹¹ pendebatur aurum, numerabatur¹² pecunia; una in domo omnes quorum intererat totum imperium populi Romani nundinabantur¹³. supplicia vero in civis Romanos nulla Tarquini accepimus: at hic et Suessae iugulavit eos quos in custodiam dederat et Brundisi ad¹⁴ ccc¹⁵ fortissimos viros civisque optimos trucidavit. [11] postremo Tarquinius pro populo Romano bellum gerebat tum cum est expulsus¹⁶: Antonius contra populum Romanum exercitum adducebat tum cum a legionibus¹⁷ relictus nomen Caesaris exercitumque pertimuit neglectisque sacrificiis sollemnibus ante lucem vota ea¹⁸ quae numquam solveret nuncupavit, et hoc tempore in provinciam populi Romani conatur invadere. Maius igitur a D. Bruto beneficium populus Romanus et habet et exspectat quam maiores nostri acceperunt a L. Bruto, principe huius maxime conservandi generis et nominis. cum autem est omnis servitus¹⁹ misera,