[25]
sed excitatus aliquando Cn. Pompei—dicam ipso audiente
quod sensi et sentio, quoquo animo1 auditurus est—
excitatus, inquam, aliquando Cn. Pompei nimium diu reconditus
et penitus abstrusus animi dolor subvenit subito rei
publicae, civitatemque fractam malis, imminutam2 ac debilitatam,
abiectam metu ad aliquam spem libertatis et pristinae
dignitatis erexit. hic vir extra ordinem rei frumentariae
praeficiendus non fuit? scilicet tu helluoni spurcatissimo,
praegustatori libidinum tuarum, homini egentissimo et facinerosissimo3,
Sex. Clodio, socio tui sanguinis, qui sua lingua
etiam sororem tuam a te abalienavit, omne frumentum privatum
et publicum, omnis provincias frumentarias, omnis
mancipes, omnis horreorum clavis lege tua tradidisti; qua
ex lege4 primum caritas nata est, deinde inopia. impendebat5
fames, incendia, caedes, direptio: imminebat tuus furor omnium
fortunis et bonis.
This text is part of:
Search the Perseus Catalog for:
Click on a word to bring up parses, dictionary entries, and frequency statistics
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.