This text is part of:
Search the Perseus Catalog for:
Click on a word to bring up parses, dictionary entries, and frequency statistics
PAMIPHILUS. PARMENO. BACCHIS.
Pam.
Vide, mi Parmeno, etiam sodes ut mihi haec certa et clara attuleris,
Ne me in breve coniicias tempus gaudio hoc falso frui.
Par.
Visum est.
Pam.
Certen?
Par.
Certe.
Pam.
Deus sum, si hoc ita est.
Par.
Verum reperies.
Pam.
Manedum sodes: timeo ne aliud credam, atque aliud nunties.
Par.
5Maneo.
Pam.
Sic te dixisse opinor, invenisse Myrrhinam
Bacchidem annulum suum habere.
Par.
Factum.
Pam.
Eum quem olim ei dedi;
Eaque hoc te mihi nuntiare iussit: itane est factum?
Par.
Ita, inquam.
Pam.
Quis me est fortunatior, venustatisque adeo plenior?
Egone te pro hoc nuntio quid donem? Quid? quid? Nescio.
Par.
10At ego scio.
Pam.
Quid?
Par.
Nihil enim.
Nam neque in nuntio neque in me ipso tibi boni quid sit scio.
Pam.
Egon, qui ab Orco mortuum me reducem in lucem feceris,
Sinam sine munere a me abire? Ah, nimium me ingratum putas.
Sed Bacchidem eccam video stare ante ostium.
15Me exspectat, credo: adibo.
Ba.
Salve, Pamphile.
Pam.
O Bacchis, O mea Bacchis, servatrix mea.
Ba.
Bene factum, et volup est.
Pam.
Factis ut credam facis;
Antiquamque adeo tuam venustatem obtines,
Ut voluptati obitus, sermo, adventus tuus, quocunque adveneris,
20Semper siet.
Ba.
Ac tu ecastor morem antiquum atque ingenium obtines,
Ut unus omnium homo te vivat nusquam quisquam blandior.
Pam.
Ha! ha! hae! tun mihi istuc?
Ba.
Recte amasti, Pamphile, uxorem tuam;
Nam nunquam ante hunc diem meis oculis eam, quod nossem, videram.
Perliberalis visa est.
Pam.
Dic verum.
Ba.
Ita me Di ament, Pamphile.
Pam.
25Dic mihi, harum rerum numquid dixti iam patri?
Ba.
Nihil.
Pam.
Neque opus est
Adeo muttito: placet non fieri hoc itidem ut in comoediis,
Omnia omnes ubi resciscunt: hic quos par fuerat resciscere
Sciunt; quos non autem aequum est scire neque resciscent neque scient.
Ba.
Immo etiam hoc qui occultari facilius credas dabo.
30Myrrhina ita Phidippo dixit, iuriiurando meo
Se fidem habuisse, et propterea te sibi purgatum.
Pam.
Optime est;
Speroque hanc rem esse eventuram nobis ex sententia.
Par.
Here, licetne scire ex te hodie quid sit quod feci boni;
Aut quid istuc est quod vos agitis?
Pam.
Non licet.
Par.
Tamen suspicor.
35Egone hunc ab Orco mortuum? quo pacto?
Pam.
Nescis, Parmeno,
Quantum hodie profueris mihi, et me ex quanta aerumna extraxeris.
Par.
Immo vero scio; neque hoc imprudens feci.
Pam.
Ego istuc satis scio.
Ba.
An temere quicquam Parmenonem praetereat quod facto usus sit?
Pam.
Sequere me intro, Parmeno.
Par.
Sequor. Equidem plus hodie boni
40Feci imprudens quam sciens ante hunc diem unquam.
Om.
Plaudite.
Publii Terentii Comoediae VI. P. Terentius Afer. Edward St. John Parry, M.A. London. Whitaker and Co., Ave Maria Lane; George Bell, Fleet Street. 1857.
NSF, NEH: Digital Libraries Initiative, Phase 2 provided support for entering this text.
This text was converted to electronic form by professional data entry and has been proofread to a medium level of accuracy.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.