Click on a word to bring up parses, dictionary entries, and frequency statistics
31. his ita rebus gestis nec in Samnitibus
adhuc nec in Etruria pax erat; nam et Perusinis
auctoribus post deductum ab consule exercitum
[2?]
rebellatum fuerat et Samnites praedatum in agrum
Vescinum1 Formianumque et parte alia in Aeserninum2 quaeque Volturno adiacent flumini descendere.
[3]
adversus eos Ap. Claudius praetor cum exercitu
Deciano missus. Fabius in Etruria rebellante denuo
quattuor milia et quingentos Perusinorum occidit,
cepit ad mille septingentos quadraginta, qui redempti
singuli aeris trecentis decem;
[4]
praeda alia omnis militibus concessa.
[5]
Samnitium legiones, cum partem Ap.
Claudius praetor partem L. Volumnius pro consule
sequeretur, in agrum Stellatem convenerunt. ibi ad
Caiatiam omnes3 considunt et Appius Volumniusque
castra coniungunt.
[6]
pugnatum infestissimis animis,
hinc ira stimulante adversus rebellantes totiens,
[p. 478]
illinc ad ultimam iam dimicantibus spem.
[7]
caesa4 ergo Samnitium sedecim milia trecenti, capta duo milia septingenti; ex Romano exercitu cecidere duo milia septingenti.
[8]
felix annus bellicis rebus, pestilentia gravis
prodigiisque sollicitus; nam et terra5 multifariam pluvisse et in exercitu Ap. Claudi plerosque fulminibus ictos nuntiatum est, librique ob haec aditi.
[9]
eo
anno Q. Fabius Gurges, consulis filius, aliquot matronas ad populum stupri damnatas pecunia multavit;
ex quo multaticio aere Veneris aedem quae prope
circum est faciendam curavit.
[10]
supersunt etiam nunc Samnitium bella, quae
continua per quartum iam volumen annumque
sextum et quadragesimum a M. Valerio A. Cornelio
consulibus,6 qui primi Samnio arma intulerunt, agimus.
[11]
et ne tot annorum clades utriusque gentis
laboresque actos nunc referam, quibus nequiverint
tamen dura illa pectora vinci,
[12?]
proximo anno Samnites
in Sentinati agro, in7 Paelignis, ad Tifernum, Stellatibus campis, suis ipsi legionibus mixti alienis, ab quattuor exercitibus, quattuor ducibus Romanis
caesi fuerant;
[13]
imperatorem clarissimum gentis suae
amiserant; socios belli, Etruscos Umbros Gallos, in
eadem fortuna videbant qua ipsi erant;
[14]
nec suis nec
[p. 480]
externis viribus iam stare poterant; tamen bello non8 abstinebant. adeo ne infeliciter quidem defensae libertatis taedebat et vinci quam non temptare victoriam malebant.
[15]
quinam sit ille, quem pigeat
longinquitatis bellorum scribendo legendoque, quae
gerentes non fatigaverunt?
1 Vescinum Sigonius (cf. chap. xx. § 1): uestinum ω.
2 Aeserninum Gronovius: aesernium MA3: aeserunium PFUT: aes (or es-)etrunium DLA.
3 ad Caiatiam omnes Conway: ad Samnitium omnes PF: ad Samnium omnes U: et Samnitium omnes MTDLA: et Samnitium legiones A6: et Samnitium legiones omnes ς: et Samnitium omnes copiae Madvig.
4 A.U.C. 459
5 terra ς (cf. III. x. 6 and vii. xxviii. 7): terram ω.
6 consulibus A2(or A4): consule ω.
7 agro, in Luterbacher: agro ω: agros PF.
8 A.U.C. 459
Livy. Books VIII-X With An English Translation. Cambridge. Cambridge, Mass., Harvard University Press; London, William Heinemann, Ltd. 1926: no copyright notice.
The Annenberg CPB/Project provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.