Titus Livius (Livy), The History of Rome, Book 41
W. Weissenborn, Ed.

27. censores eo anno creati Q. Fulvius Flaccus et A. Postumius Albinus legerunt senatum; princeps lectus M. Aemilius Lepidus pontufex maximus. [2] [p. 54] de senatu novem eiecerunt. insignes notae fuerunt M. Corneli Maluginensis, qui biennio ante praetor in Hispania fuerat, et L. Corneli Scipionis praetoris, cuius tum inter civis et peregrinos iurisdictio erat, et L. Fulvi, qui frater ¹ germanus et, ut Valerius Antias tradit, consors etiam censoris erat. [3] consules votis in Capitolio nuncupatis in provincias profecti sunt. ex iis M. Aemilio senatus negotium dedit, ut Patavinorum in Venetia seditionem conprimeret, quos certamine factionum ad intestinum bellum exarsisse et ipsorum legati adtulerant. [4] legati, qui in Aetoliam ad similis motus conprimendos ierant, renuntiarunt coerceri rabiem gentis non posse. Patavinis saluti fuit adventus consulis; neque aliud quod ageret in provincia cum habuisset, Romam rediit. [5] [p. 55] censores vias sternendas silice in urbe, glarea extra urbem substruendas marginandasque primi omnium locaverunt, pontesque multis locis faciendos; et scaenam aedilibus ² praetoribusque praebendam, [6] et carceres in circo, et ova ad notas curriculis numerandis ... dam, et metas trans ... et caveas ferrea ... intromitterentur ... feriis in monte Albano consulibus, [7] [p. 56] et clivom Capitolinum silice sternendum curaverunt, et porticum ab aede Saturni in Capitolium et ad senaculum ac super id curiam. ³ et extra portam Trigeminam emporium lapide straverunt stipitibusque saepserunt, [8] et porticum Aemiliam reficiendam curarunt, gradibusque ascensum ab Tiberi in emporium fecerunt. [9] et extra eandem portam in Aventinum porticum silice straverunt et † eo publico ab aede Veneris fecerunt. [10] idem Calatiae et Auximi muros faciendos locaverunt; venditisque ibi publicis locis pecuniam, quae redacta erat, tabernis utrique foro circumdandis consumpserunt. [11] [p. 57] et alter ex iis Fulvius Flaccus — nam Postumius nihil nisi senatus Romani populive iussu se locaturum ipsorum pecunia ... — Iovis aedem Pisauri, et Fundis, et Potentiae etiam aquam adducendam, et Pisauri viam silice sternendam, et Sinuessae ⁴ [12] magalia addenda ... aviariae in his et cloacas ... et murum circumducendum et forum porticibus tabernisque claudendum et Ianos tris faciendos. [13] haec ab uno censore opera locata cum magna gratia colonorum. moribus quoque regendis diligens et severa censura fuit. multis equi adempti.