Titus Livius (Livy), The History of Rome, Book 29
Frank Gardener Moore, Professor Emeritus in Columbia University, Ed.

11. nullasdum in Asia socias civitates habebat populus Romanus; tamen memores Aesculapium [p. 246] quoque ex Graecia quondam hauddum ullo foedere¹ sociata valetudinis populi causa arcessitum, [2?] tunc iam cum Attalo rege propter commune adversus Philippum bellum coeptam amicitiam esse, facturum eum quae posset populi Romani causa, [3?] legatos ad eum decernunt M. Valerium Laevinum, qui bis consul fuerat ac res in Graecia gesserat, M. Caecilium Metellum praetorium, Ser. Sulpicium² Galbam aedilicium, duos quaestorios, Cn. Tremelium Flaccum et M. Valerium Faltonem. [4] iis quinque naves quinqueremes, ut ex dignitate populi Romani adirent eas terras ad quas concilianda maiestas nomini Romano esset decernunt. [5] legati Asiam petentes protinus Delphos cum escendissent, oraculum adierunt consulentes ad quod negotium domo missi essent, perficiendi eius quam sibi spem populoque Romano portenderet. [6] responsum esse ferunt per Attalum regem compotes eius fore quod peterent; cum Romam deam devexissent, tum curarent ut eam qui vir optimus Romae esset hospitio exciperet.³ Pergamum ad regem venerunt. [7] is legatos comiter acceptos Pessinuntem in Phrygiam deduxit sacrumque [p. 248] iis lapidem quam matrem deum esse incolae dicebant⁴ tradidit ac deportare Romam iussit. [8] praemissus⁵ ab legatis M. Valerius Falto nuntiavit deam adportari; quaerendum virum optimum in civitate esse qui eam rite hospitio acciperet.

[9] Q. Caecilius Metellus dictator ab consule in Bruttiis comitiorum causa dictus exercitusque eius dimissus, magister equitum L. Veturius Philo. comitia per dictatorem habita.⁶ [10] consules facti M. Cornelius Cethegus, P. Sempronius Tuditanus absens, [11] cum provinciam Graeciam haberet. praetores inde creati Ti. Claudius Nero, M. Marcius Ralla, L. Scribonius Libo, M. Pomponius Matho. comitiis perfectis⁷ dictator sese magistratu abdicavit. ludi Romani ter, plebei septiens instaurati. [12] curules erant aediles Cn. et L. Cornelii Lentuli; Lucius Hispaniam provinciam habebat; absens creatus absens eum honorem gessit. [13] Ti. Claudius Asellus et M. Iunius Pennus plebei aediles fuerunt. aedem Virtutis eo anno ad portam Capenam M. Marcellus dedicavit septumo decumo anno postquam a patre eius primo consulatu vota in Gallia ad Clastidium fuerat. [14] et flamen Martialis eo anno est mortuus M. Aemilius Regillus.