Click on a word to bring up parses, dictionary entries, and frequency statistics
27. Nabis cum prospera re elatus,1 tum spem etiam haud dubiam nactus nihil iam a mari periculi
fore, et terrestres aditus claudere opportune positis
praesidiis voluit.
[2]
tertia parte copiarum ab obsidione
Gythei abducta ad Pleias posuit castra;
[3]
imminet is
locus et Leucis et Acriis, qua videbantur hostes
exercitum admoturi. cum ibi stativa essent et
pauci tabernacula haberent, multitudo alia casas ex
harundine textas fronde, quae umbram modo praeberet,
[4]
texissent,2 priusquam in conspectum hostis veniret, Philopoemen necopinantem eum improviso genere belli adgredi statuit.
[5]
navigia parva in
stationem occultam agri Argivi contraxit; in ea
expeditos milites, caetratos plerosque, cum fundis et
iaculis et alio levi genere armaturae imposuit.
[6]
inde
[p. 76]
littora legens cum ad propinquum castris hostium3 promunturium venisset, egressus callibus notis nocte Pleias pervenit et sopitis vigilibus ut in nullo propinquo metu ignem casis ab omni parte castrorum iniecit.
[7]
multi prius incendio absumpti sunt quam
hostium adventum sentirent, et qui senserant nullam
opem ferre potuerunt.
[8]
ferro flammaque omnia
absumpta; perpauci ex tam4 ancipiti peste ad Gytheum in maiora castra perfugerunt.
[9]
ita perculsis hostibus Philopoemen protinus ad depopulandam Tripolim Laconici agri,
[10?]
qui proximus finem Megalopolitarum est, duxit et magna vi pecorum hominumque inde abrepta, priusquam a Gytheo tyrannus praesidium agris mitteret, discessit.
[11]
inde Tegeam exercitu contracto concilioque eodem et Achaeis et
sociis indicto, in quo et Epirotarum et Acarnanum
fuere principes,
[12?]
statuit, quoniam satis et suorum5 a pudore maritimae ignominiae restituti animi et hostium conterriti essent, ad Lacedaemonem ducere, eo modo uno ratus ab obsidione Gythei hostem abduci posse.
[13]
ad Caryas primum in hostium terra posuit castra. eo ipso die Gytheum expugnatum est. cuius rei ignarus Philopoemen castra ad Barnosthenem—mons est decem milia passuum ab Lacedaemone—promovit.6 et Nabis,
[14?]
recepto Gytheo cum expedito exercitu inde profectus, cum praeter Lacedaemonem raptim duxisset, Pyrrhi quae vocant [p. 78] castra occupavit, quem peti locum ab Achaeis non7 dubitabat.
[15]
inde hostibus occurrit. obtinebant autem longo agmine propter angustias viae prope quinque milia passuum; cogebatur agmen ab equitibus et maxima parte auxiliorum, quod existimabat Philopoemen tyrannum mercennariis militibus, quibus plurimum fideret, ab tergo suos adgressurum.
[16]
duae res simul inopinatae perculerunt eum, una praeoccupatus quem petebat locus, altera, quod primo agmini occurrisse hostem cernebat, ubi, cum per loca confragosa iter esset, sine levis armaturae
praesidio signa ferri non videbat posse.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.