Titus Livius (Livy), The History of Rome, Book 37
Evan T. Sage, PhD professor of latin and head of the department of classics in the University of Pittsburgh, Ed.

29. traducta classe ad urbem ignaris omnibus egressi milites nautaeque sunt ad commeatus et vinum maxime dividendum in naves, [2?] cum medio forte diei agrestis quidam ad praetorem adductus nuntiat alterum iam diem classem stare ad insulam Macrin, et paulo ante visas quasdam moveri tamquam ad profectionem naves. [3] re subita perculsus praetor tubicines canere iubet, ut si qui per agros palati essent redirent; tribunos in urbem mittit ad cogendos milites nautasque in naves. [4] haud secus quam in repentino incendio aut capta urbe trepidatur, aliis in urbem currentibus ad suos revocandos, aliis ex urbe naves cursu repetentibus, incertisque¹ clamoribus, quibus ipsis tubae obstreperent, turbatis imperiis tandem concursum ad naves est.² [5] vix suas quisque noscere aut adire prae tumultu poterat; trepidatumque cum periculo et in mari et in terra foret, ni partibus divisis Aemilius cum praetoria nave primus e portu in altum evectus, excipiens insequentes, suo quamque ordine in frontem instruxisset, [6?] Eudamus Rhodiaque classis substitissent ad³ terram, ut et sine trepidatione conscenderent et ut quaeque parata esset exiret navis. [7] ita et explicuere ordinem primae in conspectu praetoris, et coactum agmen [p. 376] ab Rhodiis est, instructaque acies, velut cernerent⁴ regios, in altum processit. inter Myonnesum et Corycum promunturium erant, cum hostem conspexere. [8] et regia classis, binis in ordinem navibus longo agmine veniens, et ipsa aciem adversam explicuit laevo tantum evecta⁵ cornu, ut amplecti et circuire dextrum cornu Romanorum posset. [9] quod ubi Eudamus qui cogebat agmen vidit, non posse aequare ordinem Romanos et tantum non iam circuiri ab dextro cornu, concitat naves—et erant Rhodiae longe omnium celerrimae tota classe— aequatoque cornu praetoriae navi, in qua Polyxenidas erat, suam obiecit.