Titus Livius (Livy), The History of Rome, Book 38
Evan T. Sage, Ph.D., Ed.

49. “iniquo enim loco dimicavi. dic igitur, quo aequiore potuerim dimicare. cum hostes montem cepissent, loco se munito tenerent, nempe eundum ad hostes erat, si vincere vellem. quid? [2] si urbem eo loco haberent et moenibus se tenerent? nempe oppugnandi erant. quid? Ad Thermopylas aequone loco M'. Acilius cum rege Antiocho pugnavit? [3] quid? Philippum non eodem modo super Aoum¹ amnem iuga tenentem montium T. Quinctius deiecit? equidem adhuc qualem aut sibi fingant aut vobis videri velint hostem fuisse non invenio. [4] si degenerem et emollitum amoenitate Asiae, quid periculi vel iniquo loco subeuntibus fuit? si timendum et feritate animorum et robore corporum, huicine tantae victoriae triumphum negatis? [5] caeca invidia est, patres conscripti, nec quicquam aliud scit quam detractare virtutes, corrumpere honores ac praemia earum.² [6] mihi quaeso ita ignoscatis, patres conscripti, si longiorem orationem non cupiditas gloriandi de me, sed necessaria criminum defensio fecit. [7] an etiam per Thraciam saltus patentes qui angusti erant et plana ex arduis et culta ex silvestribus facere potui et praestare, necubi notis [p. 172] sibi latebris delitescerent latrones Thraces, [8?] ne quid³ sarcinarum raperetur, ne quod iumentum ex tanto agmine abstraheretur, ne quis vulneraretur, ne ex vulnere vir fortis ac strenuus Q. Minucius moreretur? [9] in hoc casu, quo⁴ infeliciter incidit ut talem civem amitteremus, haerent; [10] quod saltu iniquo, loco alieno cum adortus nos hostis esset, duae simul acies primi et novissimi agminis haerentem ad impedimenta nostra exercitum barbarorum circumvenerunt, quod multa milia illo ipso⁵ die, [11?] plura multo post dies paucos ceciderunt et ceperunt, hoc, si ipsi tacuerint, vos scituros, cum testis orationis meae totus exercitus sit, non credunt? [12] si gladium in Asia non strinxissem, si hostem non vidissem, tamen⁶ triumphum in Thracia duobus proeliis merueram. sed iam dictum satis est; [13] quin pro eo, quod pluribus verbis vos quam vellem fatigavi, veniam a vobis petitam impetratamque velim, patres conscripti.”