Click on a word to bring up parses, dictionary entries, and frequency statistics
2. huius generis adhortatione accensis militum1 animis consultare de summa gerendi belli coepit. eo
et C. Marcius praetor a Chalcide classe accepta venit.
[2]
placuit non ultra morando in Thessalia tempus
terere, sed movere extemplo castra atque inde
pergere in2 Macedoniam,
[3]
et praetorem dare operam, ut eodem tempore classis quoque invehatur hostium
litoribus.
[4]
praetore dimisso consul menstruum frumentum3 iusso milite secum ferre profectus decumo post die,
quam exercitum acceperat,
[5?]
castra movit; et unius
diei progressus iter convocatis itinerum ducibus cum
exponere in consilio4 iussisset, qua quisque ducturus esset, summotis iis, quam potissimum viam5 peteret, rettulit ad consilium.
[6]
aliis per Pythoum placebat via, aliis per Cambunios montes, qua priore anno duxerat Hostilius consul, aliis praeter Ascuridem
paludem.
[7]
restabat aliquantum viae communis;
itaque in id tempus, quo prope divortium itinerum
castra posituri erant, deliberatio eius rei differtur.
[8]
in Perrhaebiam inde ducit, et inter Azorum et
Dolichen stativa habuit ad consulendum rursus, quam
potissimum capesseret viam.
[9]
per eosdem dies
Perseus cum adpropinquare hostem sciret, quod iter
[p. 96]
petiturus esset, ignarus, omnis saltus insidere6 praesidiis statuit.
[10]
in iugum Cambuniorum montium —Volustana ipsi vocant—decem milia levis armaturae iuvenum7 cum duce Asclepiodoto mittit;
[11]
ad castellum, quod super Ascuridem paludem erat—Lapathus vocatur locus—, Hippias tenere saltum cum duodecim milium Macedonum praesidio iussus.
[12]
ipse cum reliquis copiis primo circa Dium stativa habuit; deinde adeo inops consilii,8 ut obtorpuisse videretur, cum equitibus expeditis litore nunc Heracleum,9 nunc Philam percurrebat, eodem inde cursu Dium repetens.
1 A.U.C. 585
2 atque inde pergere in kreyssig: adque inde peregre inde in V.
3 frumentum add. Madvig: om. V.
4 exponere in consilio J. F. Gronovius: exponerent in concilio V.
5 viam add. novák, Ceské: post quam Sigonius: om. V.
6 A.U.C. 585
7 sic V: iuvenum del. H. J. Müller: alienigenum vel plurium gentium Madvig: varium genus M. Müller.
8 deinde adeo inops consilii hartel: deinde adeo ut obtorpuisse inops consilii V: deinde a Dio, ne obtorpuisse inops consilii gitlbauer.
9 Heracleum J. F. Gronovius: Heracleam V.
Livy. Books XLIII-XLV With An English Translation. Cambridge. Cambridge, Mass., Harvard University Press; London, William Heinemann, Ltd. 1951: published without copyright notice.
The Annenberg CPB/Project provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.