Click on a word to bring up parses, dictionary entries, and frequency statistics
[47]
Quod si
tales dei sunt ut rebus humanis intersint, Natio quoque
dea putanda est, cui cum fana circumimus in agro Ardeati rem divinam facere solemus; quae quia partus
matronarum tueatur a nascentibus Natio nominata est.
ea si dea est, di omnes illi qui commemorabantur a te,
Honos Fides Mens Concordia, ergo etiam Spes Moneta omniaque quae cogitatione nobismet ipsis possumus fingere. quod si veri simile non est, ne illud
quidem est haec unde fluxerunt. Quid autem dicis, si
di sunt illi quos colimus et accepimus, cur non eodem
in genere Serapim Isimque numeremus? quod si facimus, cur barbarorum deos repudiemus? boves igitur et equos, ibis accipitres, aspidas crocodilos pisces,
canes lupos faelis, multas praeterea beluas in deorum
numerum reponemus. quae si reiciamus, illa quoque
unde haec nata sunt reiciemus.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.