Click on a word to bring up parses, dictionary entries, and frequency statistics
[41]
nec enim lubidine dominante
temperantiae locum esse, neque omnino in voluptatis regno virtutem posse consistere.
quod quo magis intellegi posset, fingere animo
iubebat tanta incitatum aliquem voluptate corporis,
quanta percipi posset maxima; nemini censebat
fore dubium quin tam diu, dum ita gauderet, nihil
agitare mente, nihil ratione, nihil cogitatione consequi posset. quocirca nihil esse tam detestabile
tamque pestiferum quam voluptatem, si quidem ea,
cum maior esset atque longior, omne animi lumen
exstingueret. haec cum C. Pontio Samnite, patre
eius, a quo Caudino proelio Sp. Postumius T. Veturius
consules superati sunt, locutum Archytam Nearchus
Tarentinus hospes noster, qui in amicitia populi
Romani permanserat, se a maioribus natu accepisse
dicebat, cum quidem ei sermoni interfuisset Plato
Atheniensis, quem Tarentum venisse L. Camillo Ap.
Claudio consulibus reperio.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.