This text is part of:
Click on a word to bring up parses, dictionary entries, and frequency statistics
23. patentibus iam portis, priusquam irrumperent victores, fuga e castris Gallorum in omnes
partes facta est. ruunt caeci per vias per invia;
nulla praecipitia saxa, nullae rupes obstant;1 nihil praeter hostem metuunt;
[2]
itaque plerique praecipites per vastam altitudinem prolapsi aut debilitati
exanimantur. consul captis castris direptione praedaque abstinet militem; sequi pro se quemque et
instare et perculsis pavorem addere iubet.
[3]
supervenit et alterum cum L. Manlio agmen; nec eos
castra intrare sinit; protinus ad persequendos hostes
mittit, et ipse paulo post tradita captivorum custodia
tribunis militum sequitur, debellatum ratus, si in illo
pavore quam plurimi caesi forent aut capti.
[4]
egresso
consule C. Helvius cum tertio agmine advenit, nec
continere suos ab direptione castrorum valuit,
praedaque eorum, iniquissima sorte, qui pugnae non
interfuerant, facta est.2 equites diu ignari et pugnae et victoriae suorum steterunt;
[5]
deinde et ipsi, quantum equis subire poterant, sparsos fuga
Gallos circa radices montis consectati cecidere aut
[p. 80]
cepere.
[6]
numerus interfectorum haud facile iniri3 potuit, quia late per omnes amfractus montium fugaque et caedes fuit,
[7?]
et magna pars rupibus inviis in profundae altitudinis convalles4 delapsa est, pars in silvis vepribusque occisa.
[8]
Claudius, qui bis pugnatum in Olympo monte scribit, ad quadraginta milia hominum auctor est caesa, Valerius Antias, qui magis immodicus in numero augendo esse solet, non plus decem milia.
[9]
numerus captivorum haud dubie
milia quadraginta5 explevit, quia omnis generis aetatisque turbam secum traxerant demigrantium magis quam in bellum euntium modo.
[10]
consul armis hostium in uno concrematis cumulo ceteram praedam conferre omnes iussit, et aut vendidit, quod eius in publicum redigendum erat, aut cum cura ut quam
aequissima esset per milites divisit.
[11]
laudati quoque
pro contione omnes sunt, donatique pro merito quisque, ante omnes Attalus summo ceterorum assensu;
nam singularis eius iuvenis cum virtus et industria
in omnibus laboribus periculisque tum modestia
etiam fuerat.
[p. 82]
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.