Titus Livius (Livy), The History of Rome, Book 38
Evan T. Sage, Ph.D., Ed.

38. ibi ex decem legatorum sententia foedus in haec verba fere cum Antiocho¹ conscriptum [p. 124] est: [2] “amicitia regi Antiocho cum populo Romano his² legibus et condicionibus esto: ne quem exercitum, qui cum populo Romano sociisve bellum gesturus erit, rex per fines regni sui eorumve qui sub dicione eius erunt transire sinito, neu commeatu neu³ qua alia ope iuvato; [3] idem Romani sociique Antiocho et iis qui sub imperio eius erunt praestent. belli gerendi ius Antiocho ne esto cum illis qui insulas colunt neve in Europam transeundi. [4] excedito⁴ urbibus agris vicis castellis cis Taurum montem usque ad Halyn⁵ amnem, et a valle⁶ Tauri usque ad iuga qua in Lycaoniam vergit. [5] ne qua praeter⁷ arma efferto⁸ [p. 126] ex iis oppidis agris castellisque quibus excedat;⁹ si qua extulit quo quaeque¹⁰ oportebit recte restituito. [6] ne militem neu quem alium ex regno Eumenis recipito. si qui earum urbium cives quae regno abscedunt cum rege Antiocho intraque fines regni eius sunt, Apameam omnes ante diem certam redeunto; [7] qui ex regno Antiochi apud Romanos sociosque sunt, iis ius abeundi manendique esto; servos seu fugitivos seu bello captos, seu quis liber captus aut transfuga erit, reddito Romanis sociisque. [8] elephantos tradito omnes neque alios parato. tradito et naves longas armamentaque earum, neu plures quam decem naves tectas neve plures quam ... naves actuarias,¹¹ nulla quarum plus quam¹² triginta remis agatur, habeto, neve monerem¹³ belli causa quod ipse illaturus erit. [9] ne navigato citra Calycadnum neu Sarpedonium promunturia, extra quam si qua navis pecuniam¹⁴ in¹⁵ stipendium aut legatos aut obsides portabit. [10] milites mercede conducendi ex iis gentibus quae sub dicione populi Romani sunt Antiocho regi ius ne esto, ne voluntarios quidem recipiendi. [11] Rhodiorum sociorumve quae [p. 128] aedes aedificiaque intra fines regni Antiochi sunt,¹⁶ quo iure ante bellum fuerunt, eo Rhodiorum sociorumve sunto; [12] si quae pecuniae debentur, earum exactio esto; si quid ablatum est, id conquirendi cognoscendi repetendique item ius esto. si quas urbes quas tradi oportet ii tenent, quibus Antiochus dedit, et ex iis praesidia deducito, utique recte tradantur,¹⁷ curato. [13] argenti probi talenta Attica duodecim milia dato intra duodecim annos pensionibus aequis—talentum ne minus pondo¹⁸ octoginta¹⁹ Romanis ponderibus pendat—et tritici quingenta quadraginta milia modium. [14] Eumeni regi talenta trecenta quinquaginta intra quinquennium dato, et pro frumento quod aestimatione fit talenta centum viginti septem. [15] obsides Romanis viginti dato et triennio mutato, ne minores octonum denum annorum neu maiores quinum quadragenum. [16] si qui sociorum populi Romani ultro bellum inferent²⁰ Antiocho, vim vi arcendi ius esto, dum ne quam urbem aut belli iure teneat aut in amicitiam accipiat. [17] controversias inter se iure ac iudicio disceptanto,²¹ aut, si utrisque [p. 130] placebit, bello. [18] ” de Hannibale Poeno et Aetolo Thoante²² et Mnasilocho²³ Acarnane et Chalcidensibus Eubulida et Philone dedendis in hoc quoque foedere adscriptum est et ut, si quid postea addi demi mutarive placuisset, ut id salvo foedere fieret.