Michael Angelus Florentinus Cassandrae Fideli s.
Salve, delitiae Phoebi, doctissima virgo:Te Musae servent, numina sacra colant.
Fama tuae laudis dudum circumvolat aures
Et magis horrescens percutit illa meas.
5Cum somno pressus divina mente viderem,
Advenit nostrum Calliopea thorum.
Haec nervum pulsans, lauro redimita capillos,
Vocibus arescit pectora nostra suis.
Versibus haec cecinit quae femina docta fuisset,
10Incipiens seclo longius orsa novo.
Praetulit, o virgo, sed te sua gaudia cunctis,
Te primam vatem dulce fatente lyra.
Tandem concentu dissolvens vincula somni,
Iussit narrarem talia visa tibi.
15Omnibus ut canerem quam sis tu cara sororum
Turbae, si statuas tam bona coepta sequi.
Plaudite nunc Veneti, vestra <...> puella
Cassandra, generisque decus expatrii.
Plaudite vos Latii, diva modulante Fidele,
20Haec morum fons est rarus in orbe fluens.
Plaudite Pegasides, vestra crescente sorore,
Quae decima est, Deli munera corde gerens.
Plaudite Nereides, Fauni per gramina plaudant,
Haec soror est Phoebi, virginitate nitens.
25Plaudite, iam sacrae coetu saliente Nepeae
Plurima nam video, virgine digna Polo.
Plaudite vos omnes venerandaque numina Nymphae,
Est vobis virgo filia docta comes.
Plaudite foeminei generis iam plaudite cunctae,
30Gloria nam surgit vestra, puella canens.
Sed iam quid varias obtundo cantibus aures?
Tecum vult paucis nunc mea Musa loqui.
Tu, felix virgo, faelicia munera sumens,
Si pergas studio Palladis alta petens.
35Si iuga Parnasi celebrabis carmine sacro,
Te Clio comitem viderit esse sibi.
Si praecepta Iovis veneraberis ipsa parentis
Et proba tu fueris religiosa pia.
Ergo tu pergas immergere ora liquore,
40Aligeri, ut vivas numinis instar equi.
Michael Angelus Florentinus sacerdos | Cassandrae Fideli Musarum alumnae s.
Es decus Aonidum. Sileat iam Lesbia virgo,Omnis vel taceat femina prisca libris.
Tu vincis cantu, cythara celestis Erynnam,
Et primos vates aequiparare potes,
5 <...> numero, si tu studiosa fuisses
Non gereret poenas garrula pica leves.
Frondibus et lauri te donans carmine Phoebus
Atque hedera Bacchus praemia digna parant
Et folium Pallas vivacis praebet olivae
10Serta deae fronti proposuere tuae.
