Click on a word to bring up parses, dictionary entries, and frequency statistics
In pedite robur; quaedam nationes et curru proeliantur.
honestior auriga, clientes propugnant. olim regibus parebant, nunc per principes factionibus et studiis trahuntur.
[2]
nec aliud adversus validissimas gentis pro nobis utilius
quam quod in commune non consulunt. rarus duabus
tribusve civitatibus ad propulsandum commune periculum
[3]
conventus: ita singuli pugnant, universi vincuntur. caelum
crebris imbribus ac nebulis foedum; asperitas frigorum
abest. dierum spatia ultra nostri orbis mensuram; nox
clara et extrema Britanniae parte brevis, ut finem atque
[4]
initium lucis exiguo discrimine internoscas. quod si nubes
non officiant, aspici per noctem solis fulgorem, nec occidere
et exurgere, sed transire adfirmant. scilicet extrema et
plana terrarum humili umbra non erigunt tenebras, infraque
[5]
caelum et sidera nox cadit. solum praeter oleam vitemque
et cetera calidioribus terris oriri sueta patiens frugum pecudumque fecundum: tarde mitescunt, cito proveniunt; eademque utriusque rei causa, multus umor terrarum caelique.
[6]
fert Britannia aurum et argentum et alia metalla, pretium
victoriae. gignit et Oceanus margarita, sed subfusca ac
liventia. quidam artem abesse legentibus arbitrantur; nam
[7]
in rubro mari viva ac spirantia saxis avelli, in Britannia,
prout expulsa sint, colligi: ego facilius crediderim naturam
margaritis deesse quam nobis avaritiam.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.