Click on a word to bring up parses, dictionary entries, and frequency statistics
Quinto expeditionum anno nave prima transgressus ignotas ad id tempus gentis crebris simul ac prosperis proeliis
domuit; eamque partem Britanniae quae Hiberniam aspicit copiis instruxit, in spem magis quam ob formidinem, si
quidem Hibernia medio inter Britanniam atque Hispaniam
sita et Gallico quoque mari opportuna valentissimam imperii
[2]
partem magnis in vicem usibus miscuerit. spatium eius, si
Britanniae comparetur, angustius nostri maris insulas superat. solum caelumque et ingenia cultusque hominum haud
multum a Britannia differunt; melius aditus portusque per commercia et negotiatores cogniti.
[3]
Agricola expulsum seditione domestica unum ex regulis gentis exceperat
ac specie amicitiae in occasionem retinebat. saepe ex eo
audivi legione una et modicis auxiliis debellari obtinerique
Hiberniam posse; idque etiam adversus Britanniam profuturum, si Romana ubique arma et velut e conspectu
libertas tolleretur.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.